Европа се соочува со сериозна суша поради долготраен недостиг на врнежи и силни топлотни бранови, што создава големи економски и природни штети кои би можеле да достигнат 126 милијарди евра годишно.
Европа се соочува со суша од големи размери поради повеќемесечниот недостиг на врнежи, високите летни температури и вториот екстремен топлотен бран за само еден месец. Според проценките на експертите, економските штети од сушите и жештините до 2029 година би можеле да достигнат дури 126 милијарди евра годишно.
Последиците веќе се чувствуваат низ целиот континент. Од април до јуни, од Португалија до јужна Финска, се регистрирани значително помалку врнежи од просекот, што доведе до ниски водостои на големите европски реки, меѓу кои Дунав и Рајна. Речиси пресуши и езерото Брене на швајцарско-француската граница, кое повеќе од една недела не е пловно.
Сушата предизвикува сериозни последици и за земјоделството. Франција стравува од најслаб род на пченка во последните 50 години, Шпанија го ограничи користењето вода за наводнување, Холандија воведе посебни мерки поради недостиг на вода, а на седум грчки острови е прогласена вонредна состојба.
Ниските водостои ја нарушија и пловидбата по Рајна, што ги принуди германските фабрики да го намалат производството. Економистите предупредуваат дека нарушувањата во транспортот би можеле да го намалат економскиот раст на Германија за 0,2 процентни поени.
Климатолозите предупредуваат дека екстремните температури, поттикнати од глобалното затоплување, стануваат главен двигател на сушите. Според нив, високите температури го сушат почвеното земјиште и вегетацијата и го забрзуваат испарувањето на водата од реките, езерата и акумулациите, а ваквите појави ќе стануваат сè почести и поинтензивни.
Денес
