Грција и понатаму е во состојба на висока готовност поради големите шумски пожари кои продолжуваат да беснеат низ земјата, додека нови пожари повторно се активираат и во Франција.

Критична состојба во Грција

За голем дел од Грција е проценет највисок ризик од шумски пожари, а службите за цивилна заштита прогласија највисок, црвен степен на тревога за поширокиот атински регион.

Најкритично било во подрачјето околу 60 километри северозападно од главниот град Атина, каде пламените јазици се ширеле на фронт долг неколку километри. Според медиумските извештаи, стотици луѓе биле евакуирани и пренесени на безбедно со бродови.

Пожари беснееле и на полуостровот Пелопонез. Портпаролот на противпожарната служба изјавил дека екипите во петокот вечерта се бореле со огнените жаришта на 73 локации.

Нов голем пожар избувнал западно од Атина, поради што превентивно било евакуирано предградието Дасос, откако густиот чад и пламените јазици се заканувале на густо населеното подрачје.

Големи пожари продолжиле да горат и на Крит. Иако состојбата на островот се подобрила, засилените ветрови претставуваат опасност од повторно разгорување на огнот и сериозно ги отежнуваат воздушните операции за гасење.

Илјадници евакуирани во Франција

Во департманот Вар, на југот на Франција, меѓу Марсеј и Кан, пожарот повторно се активирал и брзо се проширил во петокот, поради што околу 2.500 луѓе биле евакуирани.

Според локалните власти, за неколку часа изгореле околу 1.000 хектари земја. Во петокот вечерта било соопштено дека на терен се распоредени 720 пожарникари.

Франција и соседна Шпанија се борат со серија големи шумски пожари предизвикани од високите температури, сушната вегетација и силните ветрови. Научниците предупредуваат дека климатските промени придонесуваат за почести и поинтензивни пожари.

Со големи шумски пожари се соочува и Турција, која исто така се бори со ограничување на ширењето на огнената стихија.