Најмалку девет лица загинаа, а 27 се повредени, меѓу кои и четири деца, во руски ракетен напад врз Киев во текот на ноќта. Украинската престолнина беше погодена со балистички ракети, по што низ градот одекнаа серија експлозии, а густ чад го прекри небото.

Украинската Државна служба за вонредни ситуации соопшти дека спасувачките екипи досега извлекле 105 лица. Пожари и оштетувања се регистрирани на станбени објекти и индустриски капацитети во најмалку пет градски области.

Најтешко погодена е областа Дарницки, каде загинале седум лица, а уште 14 се повредени, меѓу кои две деца. Ова е втор голем руски напад врз Украина во рок од помалку од 48 часа.

Нападот започнал околу 1:33 часот по локално време, кога Киев бил потресен од силни експлозии. Украинските воздухопловни сили предупредиле дека кон градот се упатуваат повеќе балистички ракети. Нов бран експлозии бил регистриран околу 2:16 и 3:20 часот.

Градоначалникот на Киев, Виталиј Кличко, ги повика жителите да се засолнат, предупредувајќи дека градот е под напад со руски балистички ракети.

Луѓе заробени под урнатини

Руските ракети погодиле станбени и деловни објекти, магацини, пералници за автомобили и паркинзи. Во неколку станбени згради, жителите останале заробени по ударите.

Кличко соопшти дека остатоци од ракета погодиле петкатница во областа Соломјански, предизвикувајќи пожар и отежнувајќи ја евакуацијата. Подоцна, Државната служба за вонредни ситуации информираше дека дел од објектот се урнал и избувнал пожар.

Слична ситуација била регистрирана и во областа Шевченкивски, каде луѓе останале заробени по делумно уривање на зграда. Во истата област биле оштетени деловен објект и неколку возила на итната помош, а пожарот бил изгаснат.

Пожари биле пријавени и во областите Голосијивски, Дарницки, Шевченкивски и Соломјански, каде се оштетени повеќе станбени згради. Надвор од Киев, во Киевската област, повредени се уште две лица.

Москва ја засилува употребата на балистички ракети

Русија и претходно во текот на неделата изврши масовни напади со беспилотни летала и ракети врз повеќе украински градови, при што загинаа најмалку осум лица, а повеќе од 50 беа повредени.

Украинските власти оценуваат дека руската тактика е насочена кон преоптоварување на украинската противвоздушна одбрана со голем број ракети и дронови, со цел нанесување што поголема штета.

Балистичките ракети претставуваат посебен предизвик бидејќи мал број системи можат ефикасно да ги пресретнат. Украина во голема мера се потпира на системите „Патриот“, но нејзините резерви на пресретнувачки ракети се ограничени.

Американскиот претседател Доналд Трамп претходно изјави дека ќе ѝ дозволи на Украина сама да произведува ракети за системите „Патриот“, но подоцна ја ублажи изјавата, посочувајќи дека за таквата технологија сè уште се разговара.