Северна Кореја го обвинува НАТО за проширување на својата воена инфраструктура во Европа, оцени како подготовка за војна. Пјонгјанг ја критикува мрежата за транспорт на гориво која ги поврзува западните и источните членки на Алијансата и ја нагласува зголемената агресивност на НАТО.
Северна Кореја го обвини НАТО дека се подготвува за војна преку проширување на воената инфраструктура за гориво низ Европа, оценувајќи дека плановите на Алијансата покажуваат оти таа станува сè поагресивен воен блок.
Во коментар објавен преку државната новинска агенција КЦНА, Пјонгјанг го критикуваше планот на НАТО за обновување на инфраструктурата за снабдување со гориво. Северна Кореја тврди дека проектот ќе поврзе мрежа за транспорт на гориво долга околу 10.000 километри во Западна Европа со поновите членки на Алијансата во Источна и Северна Европа.
КЦНА не понуди докази за тврдењата дека проектот е наменет за поддршка на можни конфликти надвор од Европа. Од НАТО, пак, посочуваат дека ги зајакнуваат одвраќањето и одбранбените капацитети по руската инвазија врз Украина во 2022 година.
Северна Кореја претходно ја осуди воената соработка меѓу САД, Јужна Кореја и други земји, меѓу кои и членки на НАТО.
Во меѓувреме, Пјонгјанг и Москва ги продлабочија воените врски по потпишувањето на договорот за сеопфатно стратешко партнерство во јуни 2024 година, кој вклучува обврска за заемна одбрана.
Според западни проценки, Северна Кореја во 2024 година испратила околу 14.000 војници во руската Курска област, со цел да им помогне на руските сили во одбивањето на упадот на украинските сили.
