Кога пред да тргнете го проверувате сообраќајот на „Google Maps“, апликацијата не ги прикажува само актуелните сообраќајни метежи, туку со помош на вештачка интелигенција (AI) проценува и како тие ќе се развиваат во текот на вашето патување.
Затоа многу возачи пред поаѓање ги проверуваат можните рути и ги избегнуваат делниците означени со жолта или црвена боја.
Податоците за моменталната состојба на патиштата се собираат преку обединување на информациите од телефоните на корисниците кои веќе се движат по тие правци и ја користат апликацијата. Врз основа на брзината на нивното движење, „Google Maps“ може да процени каде сообраќајот е забавен или целосно блокиран, пренесува „Benchmark“.
Меѓутоа, апликацијата не ја прикажува само моменталната состојба, туку се обидува да предвиди и како сообраќајниот метеж ќе се менува во текот на патувањето. „Google Maps“ користеше AI технологии за прогнозирање на сообраќајот многу пред вештачката интелигенција да стане широко распространет маркетиншки поим.
Системот ги комбинира податоците во реално време со историски информации за сообраќајот на одреден пат, во одреден период од денот и во одредени денови од неделата.
Во поголемиот дел од деновите, сообраќајот се одвива според релативно предвидливи обрасци. Рутите што вработените секојдневно ги користат најчесто се најоптоварени за време на утринскиот и попладневниот шпиц, додека во останатите периоди се значително попроодни.
Сепак, вонредните настани можат целосно да го нарушат вообичаениот тек на сообраќајот. Сообраќајна несреќа, работи на патот или затворена делница можат да ги принудат возачите да користат алтернативни правци, па затоа метежи се појавуваат и на места каде што вообичаено не се очекуваат.
Поради тоа, „Google Maps“ не може да се потпира само на претходно собраните податоци. AI ги анализира актуелните информации и ги споредува со долгорочните трендови за да ја процени идната состојба и да предложи рута со најкратко очекувано време на патување.
Сличен пристап користи и навигациската апликација „Waze“, која ги комбинира историските и тековните податоци при пресметката на проценетото време на пристигнување. Притоа, „Waze“ го зема предвид и типот на возило што го управува корисникот.
Автомобилите во сообраќаен метеж најчесто ќе се движат со приближно иста брзина, додека мотоциклистот во одредени ситуации може полесно да се пробие низ колоната. Затоа апликацијата ја приспособува проценката на времето на патување според достапните податоци за возилото и условите на патот.
Точноста на овие прогнози зависи од количината и квалитетот на собраните податоци, но постојано се подобрува како што системите добиваат повеќе информации и користат понапредни алгоритми. Дури и корисниците кои ги користат само основните функции имаат корист од процесите што непрекинато се одвиваат во позадина, пишува „BGR“.
