Пожарот кај Велес се прошири во правецот на патот за Штип, предизвикувајќи густи чадови. Министерството за внатрешни работи ја регулира сообраќајната состојба, а состојбата постојано се следи од Главниот штаб за управување со кризи.
Опасноста од пожарот во месноста „Дорутовец“ кај Велес е намалена по интервенцијата на противпожарните авиони „ер трактор“ на Дирекцијата за заштита и спасување (ДЗС), пожарникарите од ТППЕ Велес, месното население од селото Чалошево и екипа со цистерна од ЈП „Дервен“.
Сепак, пожарот се проширил во правец на патот Велес–Штип. Поради густиот чад што ветерот го носи кон автопатот, Главниот штаб за управување со кризи побарал поддршка од Министерството за внатрешни работи за регулирање на сообраќајот, согласно потребите.
Од ДЗС информираат дека состојбата континуирано се следи од Главниот штаб за управување со кризи, во координација со екипите на терен.
Во меѓувреме, до 18 часот во државата биле регистрирани вкупно девет пожари на отворен простор. Од нив, четири се активни, пет се изгаснати, а ниту еден не е ставен под целосна контрола.
