Харисон Форд се појавил на сцената за да ја врачи наградата „Филантропска организација на годината“ на Фондацијата „Мајкл Џеј Фокс“ за нејзиниот извонреден придонес во истражувањето на Паркинсоновата болест. Фондацијата, која Фокс ја основал заедно со својата сопруга, досега има собрано и финансирано повеќе од три милијарди долари за научни истражувања.
За време на емотивниот говор, 84-годишниот Форд се присетил како Фокс ја дознал својата дијагноза пред повеќе од три децении.
„Пред 35 години Мајкл Џеј Фокс доби многу лоши вести. Повеќето луѓе едноставно би се обиделе да го издржат тоа, но Мајкл веднаш се фати за работа“, рекол Форд.
Тој додал дека улогата на Пол Роудс во серијата „Shrinking“, лик кој исто така се бори со Паркинсоновата болест, му помогнала подобро да разбере со што неговиот пријател се соочува секојдневно.
„Таа улога ми овозможи да го сфатам Мајкл и како актер и како пријател и како најупорниот оптимист што го познавам. Преку него сфатив што сè навистина прави неговата фондација“, гордо истакнал легендарниот актер.
Собирање надеж, а не сожалување
Фокс на сцената, во разговор со авторот на серијата „Shrinking“, Бил Лоренс, се присетил на моментот кога јавно ја објавил својата дијагноза. Признал дека на почетокот бил изненаден од позитивните реакции на луѓето кои боледуваат од Паркинсонова болест.
„Не ми беше јасно зошто би го славеле тоа. Потоа сфатив дека заболените толку долго немаа свој глас. Се сметаше дека тоа е болест на старите луѓе, дека болните треба да бидат оставени на тремот да се нишаат во столче додека не престанат. Но, не мора да биде така“, истакнал 65-годишниот Фокс.
Тој е уверен дека ќе биде пронајден лек и додал дека младите луѓе кои живеат со оваа болест се исклучително вредни и корисни членови на општеството.
