Авиокомпанијата од Дубаи нарача вкупно 270 нови авиони „Boeing 777X“, чија поединечна вредност изнесува околу 440 милиони долари. Првиот авион беше произведен уште во 2019 година, но поради повеќекратните одложувања предизвикани од измените во дизајнот, „Emirates“ ниту седум години подоцна не ги доби своите летала.

Претседателот на „Emirates“, Сер Тим Кларк, изјави дека првите 10 авиони бараат толку многу дополнителни модификации за да ги исполнат најновите стандарди што компанијата ги смета за несоодветни за употреба.

„Можеби „Heinz“ ќе биде заинтересиран“

„Нема да ја преземеме таа серија и тоа е конечна одлука. Што ќе направи „Boeing“ со нив, тоа е нивен проблем“, изјави Кларк за „The Telegraph“ на воздухопловниот саем „Farnborough International Airshow“.

Тој додаде дека знае оти „Boeing“ се обидува да најде купувач за тие авиони, а потоа се пошегува:

„Можеби „Heinz“ ќе биде заинтересиран, за конзерви за печен грав“.

„Heinz“ е американски прехранбен бренд, познат по кечапот, но и по конзервираната храна. Во Велика Британија е особено познат по производот „Heinz Beanz“, печен грав во сос од домати што се продава во конзерви.

Одбивањето да се преземат авионите претставува нов сериозен удар за „Boeing“, кој во последните години е погоден од низа безбедносни кризи. Кларк напомена дека „Emirates“ не сака да ги преземе тие 10 авиони бидејќи дизајнот на моделот „777X“ во текот на развојот претрпел толку големи промени што нивното усогласување со најновите стандарди повеќе не е изводливо.

Развојот на моделот беше одбележан со бројни проблеми

Програмата за развој на моделот „777X“ беше одбележана со бројни проблеми, поради кои почетокот на неговата комерцијална употреба беше одложен од планираната 2020 година најрано за следната година.

Меѓу проблемите беа дефектот на системот за управување со потисокот, кој во 2024 година ги запре тест-летовите, како и инцидентот од 2020 година, кога носот на авионот се подигнал без никаква команда од пилотот, што дополнително ја одложи програмата за неколку години.

„Промените на конструкцијата беа многу големи. Да не заборавиме дека имавме и неуспех при статичкото тестирање. Летав со првиот примерок во 2019 година. Беше целосно опремен, освен нашите кабини од прва класа, а сега е 2026 година. Поминаа седум години. Нема да ги преземеме“, нагласи Кларк.

Неговите изјави следуваа откако беше објавено дека еден од авионите наменети за „Emirates“ веќе е отпишан. Авионот со околу 400 седишта тивко бил демонтиран во 2025 година, откако шест години бил паркиран на аеродром во близина на производствениот центар на „Boeing“ во Сиетл, објави „The Air Current“.

Ќе мора да докаже дека може да го прелета океанот со еден неисправен мотор

Стефани Поуп, претседателка на „Boeing Commercial Airplanes“, изјави дека на авионите биле правени измени како што проектот созревал.

„Кога ќе ги погледнете тие рани примероци, мора да процените колку промени ќе бидат потребни и каква корист ќе донесат тие“, истакна таа.

„Секогаш проценуваме колку ќе чинат тие измени, какви способности ќе има авионот и настојуваме да го пронајдеме најдоброто решение не само за „Boeing“, туку и за нашиот клиент“, додаде таа.

Според аналитичарите на инвестициската куќа „Jefferies“, тест-летовите на моделот „777-9“, првата варијанта од новиот „777X“, би требало да завршат до крајот на оваа година. Потоа авионот ќе мора да докаже дека може да изведува долги летови над океан со еден неисправен мотор, што е еден од клучните услови за сертификација.

Со тоа би се отворил патот првиот авион да ѝ биде испорачан на „Lufthansa“ пред крајот на 2027 година. На прашањето кога „British Airways“ ја очекува испораката на првиот од 24-те нарачани авиони, главниот извршен директор на компанијата, Шон Дојл, кусо одговори: „Добро прашање“.