Орките, познати и како китови-убијци, покажале досега незабележана заедничка стратегија за лов – со огромна брзина се залетуваат кон големи и тешки риби и ги удираат толку силно што ударот ги распарчува на делови.

„Не можев да поверувам што гледам“

Научниците сметаат дека ваквото однесување им овозможува на орките полесно да дојдат до храна, но не ја исклучуваат ниту можноста дека станува збор за своевидна игра, пренесува „CNN“.

Истражувачите оваа појава ја забележале во текот на 2024 и 2025 година во Тихиот Океан. Подводните снимки прикажуваат неверојатна координација меѓу единките, а резултатите од истражувањето се објавени во списанието „Frontiers in Ethology“.

Првата снимка ја направила Кетлин Ејрес од организацијата за заштита на морињата „Beneath the Waves“. На 29 јули 2024 година, таа снимила несекојдневна сцена во близина на брегот кај Сан Хосе дел Кабо.

„Не можев да поверувам што гледам“, изјави Ејрес, главна авторка на студијата и првата личност која со камера го документирала ваквото однесување на орките.

Организирани напади

Инаку, таа се занимава со проучување на ајкули, но однесувањето на орките кои ловат ајкули во Калифорнискиот Залив ја поттикнало да ги истражува и овие морски цицачи.

Во последните години орките го привлекоа вниманието на јавноста поради нападите и потопувањето јахти во водите кај Шпанија и Португалија. Сепак, Ејрес истакнува дека она што овојпат било особено впечатливо е исходот од нападот.

„Да се види како огромната океанска сончева риба се распаѓа на парчиња беше нешто со што никогаш претходно не сум се сретнала“, рече таа.

Делови од пленот пловеле по водата

Втората снимка ја направил туристички оператор во Калифорнискиот Залив, во септември 2025 година. И овојпат била забележана совршена соработка – една орка ја држела големата океанска сончева риба (Mola mola) за опашката, додека друга со голема брзина се залетала кон неа.

Непосредно пред „судирот“, орката што го држела пленот го пуштила, овозможувајќи ѝ на другата со силен удар да ја погоди рибата. Потоа помладите орки почнале да ги јадат парчињата што пловеле по водата, додека возрасните единки ги распарчувале преостанатите делови од телото.

Океанската сончева риба (Mola mola) може да достигне тежина поголема од 1.800 килограми и должина до три метри.

„Беше неверојатно да се види такво однесување“, изјави Моника Вајланд Шилдс, директорка на Институтот за однесување на орките, која не учествувала во новото истражување.