Без разлика дали сте љубител на домашно кафе, капучино или афогато, претпоставуваме дека на кафето гледате како на вкусен додаток во исхраната, но дали знаете дека рецептот за т.н. кафе „отпорно на куршуми“ понекогаш може ефикасно да замени дури и цел оброк?

Како настанало „Bulletproof coffee“?

Дејв Аспри, успешен претприемач од Силициумската Долина, имал речиси 136 килограми кога отпатувал на Тибет. На надморска височина од околу 5.500 метри и температура од -23 степени, енергијата нагло му опаднала и бил принуден да затропа на вратата на еден од локалните жители. Откако испил шолја кремаст чај со путер од јак, почувствувал огромен наплив на енергија.

По истражувањата, дознал дека овој напиток е секојдневна потреба за луѓето што живеат на Тибет, бидејќи работат и живеат во сурови услови на големи надморски височини, но и дека е корисен за слабеење. На крајот, малку го изменил нивниот традиционален рецепт – чајот го заменил со кафе, а путерот од јак со обичен кравји путер. Додал и кокосово масло. Така настанал рецептот за т.н. „Bulletproof coffee“ – кафе „отпорно на куршуми“.

Кои се придобивките од консумирањето на ова кафе?

Една шолја од овој напиток со додадени масти содржи дури 200 до 500 калории, па неговите приврзаници го консумираат уште на почетокот на денот, а велат и дека е особено погоден доколку постите или сте на кетогена диета.

Иако станува збор за многу калоричен напиток, тој може да помогне и при слабеење, бидејќи содржи здрави масти што лесно се апсорбираат. Основата на „Bulletproof coffee“ се путерот и кокосовото масло, чии заситени масти и холестерол го поттикнуваат забрзувањето на метаболизмот, давајќи чувство на ситост со часови, додека истовремено согорувате масти. Самиот креатор на овој напиток истакнува дека со негова помош може да се изгубат дури и до 40 килограми.

Бројни љубители на ова кафе тврдат дека им го подобрува менталниот фокус и ја зголемува концентрацијата, дека им ја одржува енергијата и до шест часа, обезбедува чувство на ситост, а истовремено помага и во зачувување и изградба на мускулната маса.

Дали пофалбите навистина се оправдани?

Од друга страна, бројни експерти и нутриционисти не се согласуваат дека ова кафе може самостојно да го замени појадокот, бидејќи содржи многу заситени масти, а недоволно хранливи состојки.

Покрај тоа, поддржувачите на класичниот утрински оброк не ја поддржуваат ниту употребата на кофеин за потиснување на апетитот, бидејќи, особено кај луѓето чувствителни на кофеин, редовното консумирање кафе може да ја зголеми анксиозноста, да предизвика главоболка и нарушувања на сонот.

Како се подготвува ова кафе?

Потребно ви е:

• една полна шолја топло инстант или филтер-кафе;
• две лажички кокосово масло;
• една лажичка путер

Состојките треба да се изблендираат или да се изматат со рачен блендер додека не забележите дека се создава пена. Секако, по желба можете да додадете и зачини, како цимет или ванила, за подобар вкус.

Исто така, доколку не сте љубител на кафе, истиот рецепт можете да го примените и „на тибетски начин“, така што наместо кафе ќе користите чај.