Експертите ги предупредуваат возачите во текот на летните горештини да обрнат посебно внимание на притисокот во гумите, бидејќи високите температури можат да го зголемат ризикот од нивно оштетување или пукање.
Загреаниот асфалт и неправилно напумпаните гуми претставуваат комбинација што може да доведе до опасни ситуации во сообраќајот, особено при возење со поголема брзина.
Како што расте температурата на воздухот, се зголемува и притисокот на воздухот во гумите. Иако промената може да изгледа незначителна, таа може дополнително да ја оптовари веќе истрошената или неправилно напумпана гума.
Поради тоа, експертите советуваат притисокот во гумите редовно да се проверува, особено пред подолги патувања.
Покрај гумите, за време на топлите денови дополнително се оптоварени и другите делови на возилото. Високите температури можат да го зголемат ризикот од прегревање на моторот, поради што е важно да се провери нивото на ладилната течност, како и на останатите течности во возилото.
На возачите им се препорачува во автомобилот секогаш да имаат доволно вода, како за себе, така и за евентуални непредвидени застои на патот.
Многу понови автомобили се опремени со систем за следење на притисокот во гумите, кој го предупредува возачот кога притисокот ќе падне под препорачаните вредности. Сепак, експертите нагласуваат дека не треба целосно да се потпирате на електрониката, туку повремено рачно да ја проверите состојбата на гумите и нивниот притисок.
Доколку притисокот во гумите е превисок, вишокот воздух може едноставно да се испушти. Пред тоа, потребно е да се проверат препорачаните вредности на производителот, потоа да се отстрани заштитното капаче од вентилот и постепено да се испушта воздухот во кратки интервали, со редовни проверки на притисокот.
Правилно напумпаните гуми придонесуваат за поголема безбедност, подобра управливост на возилото и помал ризик од сообраќајни незгоди за време на летните патувања.
