Поранешен автомеханичар анонимно признал во едно видео дека повеќе од 200 пати пријавил извршени гаранциски поправки кои всушност никогаш не ги направил.
Видео-снимката со исповедта на анонимниот поранешен механичар стана вистински хит на интернет, собирајќи повеќе од 168.300 прегледи на страницата „Finance Clips“, која објавува вирални видеа, во моментот кога порталот „Motor1“ објави текст за овој случај.
Имено, механичарот со години спроведувал едноставна, но крајно несовесна измама: целосно ја прескокнувал гаранциската поправка на автомобилот, а до гаранциската компанија пријавувал дека работата е успешно завршена. На прашањето колку пати успеал да помине неказнето, проценил дека тоа било околу 200 пати, а можеби и повеќе.
Добил отказ откако бил откриен поради грешка
Во видеото, механичарот се присетил на еден конкретен случај што го чинел работното место. Возилото повторно било вратено во сервис, а друг техничар забележал дека делот кој наводно бил заменет воопшто не бил допрен. Шефот го повикал на разговор, а механичарот тврди дека веднаш добил отказ.
Во друг случај, раскажува тој, работел на мотор кој имал проблем со палењето. На возилото поминал околу 60 часа, но според гаранцискиот систем требало да му бидат платени само околу 28 часа. Токму овој несразмерен систем, според него, бил главната причина што почнал да извршува измами.
@finance.clips03 Why This Ex-Mechanic Committed Warranty Fraud 200+ Times #theicedcoffeehour #mechaniclife #finance #podcastclips #fyp @The Iced Coffee Hour Clips re ♬ original sound - Finance Clips
„Имам морал, но …“
Во видеото објаснил дека никогаш не ги измамувал приватните клиенти, туку исклучиво гаранциските компании.
„Никогаш не би му го направил тоа на клиент кој лично плаќа, затоа што имам морал, се разбира. Но, кога станува збор за гаранциска компанија која секојдневно те искористува, мораш некако да се снајдеш.“
Својата измама ја опишува како „изедначување на условите“, правдајќи се со системот на плаќање кој, според него, ги става механичарите во неповолна положба.
Станува збор за таканаречениот „flat-rate“ модел, при кој техничарот не се плаќа за секој реално поминат час на возилото, туку според однапред утврден норматив од работниот прирачник. Производителите, притоа, обично одредуваат пониски паушални норми за гаранциските поправки отколку за поправките што директно ги плаќа клиентот, што значи дека механичарите можат да заработат помалку дури и кога работата е покомплицирана и трае подолго.
Реакции: „Тоа едноставно не е исправно“
Видеото предизвика бурна расправа во коментарите. Голем број автомеханичари го отфрлија неговото оправдување, оценувајќи дека таквото однесување е непрофесионално и неприфатливо.
Порталот „Motor1“, кој известуваше за овој случај, стапил во контакт со авторот на повторно објавеното видео за дополнителен коментар, но до објавувањето на текстот не добил одговор.
Приказната на механичарот, засега, се темели исклучиво на неговото лично сведочење, без независна потврда на наведените тврдења.
