Британската полиција уапси 28-годишен маж во Јужен Јоркшир под сомнение дека ја убил поранешната конзервативна министерка и истакната членка на партијата Реформ УК, Ен Видикомб.

Видикомб беше пронајдена мртва со тешки повреди во четвртокот во 11:40 часот во нејзиниот дом во Хејтор, во Девон. Полицијата верува дека нападот се случил речиси 24 часа пред да биде откриено нејзиното тело.

Според Полицијата на Девон и Корнвол, осомничениот бил уапсен на адреса во Јужен Јоркшир, на околу 430 километри од имотот на Видикомб. Станува збор за британски државјанин, кој се наоѓа во полициски притвор.

Од полицијата соопштија дека во акцијата учествувале и антитерористичката полиција за североисточна Англија и полицијата на Јужен Јоркшир, но нагласија дека засега нема индикации дека станува збор за терористички инцидент.

Второ апсење во рамки на истрагата

Ова е второ апсење во истрагата за убиството. Претходно, во Њутон Абот, на околу 18 километри оддалеченост, беше уапсен 26-годишен маж под сомнение за убиство.

Тој во саботата беше ослободен, а полицијата соопшти дека повеќе не е дел од истрагата.

Во изминатите денови околу домот на Видикомб во Девон беше забележано засилено полициско присуство, додека форензичарите вршеа увид и собираа докази.

Исклучена можноста за политички мотивиран напад

Од истрагата првично беа вклучени и антитерористички службеници, но тие ја исклучиле можноста за терористички напад, откако не биле пронајдени докази дека смртта на Видикомб била политички мотивирано злосторство.

Полицијата засега не објавува детали за можниот осомничен или снимки од надзорни камери, со образложение дека предвременото објавување информации може да ја загрози истрагата.

Политичари и граѓани се простуваат од Видикомб

По веста за нејзината смрт, бројни граѓани положија цвеќе во близина на нејзиниот дом во Националниот парк Дартмур.

Лидерот на Реформ УК, Најџел Фараж, ја опиша Видикомб како „исклучителна личност“ и „еден од најголемите бранители на слободата на говорот“.

Почит кон неа изразија и британскиот премиер Кир Стармер, како и лидерката на Конзервативната партија Кеми Баденок, кои ја истакнаа нејзината долгогодишна работа во јавниот живот.

Политичка кариера долга повеќе децении

Ен Видикомб беше пратеничка од редовите на Конзервативната партија во Долниот дом на британскиот парламент од 1987 до 2010 година.

Во владата на Џон Мејџор извршуваше функции министерка за вработување, затворски систем и внатрешни работи, а по изборниот пораз на конзервативците во 1997 година продолжи со високи функции во опозицијата.

По напуштањето на парламентот, Видикомб беше активна во медиумите и учествуваше во телевизиските емисии „Стриктли Кам Денсинг“ и „Селебрити Биг Брадер“.

Во 2019 година се врати во политиката како членка на Партијата за Брегзит и европратеничка, а од 2023 година беше дел од Реформ УК, каде што работеше како портпаролка за имиграција и правосудство.