Мет Дејмон во филмот „The Odyssey“, во режија на Кристофер Нолан, го толкува главниот лик, Одисеј, лукавиот крал на Итака кој, по завршувањето на Тројанската војна, се обидува да се врати дома. Оскаровецот снимањето го опиша како напорна експедиција.

Нема сомнеж дека семејството му било голема поддршка и за време на овој предизвикувачки проект.

Мет Дејмон (55) е инспирација за многумина, не само поради своите улоги, туку и поради начинот на живот, вредностите што ги застапува и репутацијата на еден од најдобрите сопрузи меѓу холивудските актери. Од 2005 година е во брак со Лусијана Баросо (49). Нивната брачна идила не ја нарушил ниту еден скандал, што воопшто не е лесно ако се има предвид неговата кариера и големото медиумско внимание што ги следи.

Дејмон е еден од ретките актери кои во јавноста најчесто се појавуваат поради својата работа, па и по тоа е исклучок од холивудската практика. Токму работата му го донела и познанството со Баросо.

Својата сопруга Лусијана ја запознал во едно кафуле во Мајами, додека работел на комедијата „Stuck on You“.

„Не знам како воопшто би нѝ се вкрстиле патиштата ако тоа не се случеше, ако сите тие работи не се случеа“, изјавил актерот во 2011 година во емисијата на Елен Деџенерис.

Филмот првично требало да се снима на Хаваи, но продуцентите и режисерите сепак одлучиле сетот да биде во Мајами. За среќа на познатиот пар.

„Една вечер, среде снимањето, неколку момци од екипата ми рекоа: „Еј, ајде да одиме некаде на пијалак“. Им одговорив: „Не, не сум баш расположен за тоа“, но некако ме убедија да тргнам со нив“, се присети актерот.

Отишле во кафулето каде што Лусијана работела како шанкерка.

„Буквално ја забележав во преполната просторија“, се присети Дејмон.

Лусијана, меѓутоа, во разговор за „Vogue“ раскажа малку поинаква верзија од нивната средба:

„Мет вели дека ме видел од другата страна на просторијата и дека светлото било насочено кон мене. А јас велам: „Да, тоа беше ноќен клуб, светла имаше насекаде“. Луѓето го препознаа, бараа автограми и сакаа да се фотографираат со него. Ситуацијата стана малку непријатна бидејќи гостите на локалот пиеја, па дојде и се сокри зад мојот шанк. Ми рече: ‘Те видов и навистина сакав да разговарам со тебе’“, раскажа таа.

Лусијана му рекла дека ќе мора да ѝ помогне околу работата ако таа вечер планира да остане зад шанкот.

„Неколку години претходно се подготвувал за улога на бармен, па почна да подготвува пијалаци. Таа вечер нѝ заработи огромен бакшиш“, раскажа таа и продолжи:

„Дефинитивно веднаш воспоставивме посебна врска. Беше толку лесно да се разговара со него, а во негово друштво се чувствував многу пријатно. Кон крајот на вечерта ме покани да излезам со неговите пријатели, но му реков: ‘Не можам, имам четиригодишна ќерка’“.

„Ми се допаѓа што си мајка и што тоа ти е приоритет“

За жал, за многу мажи таквата реченица би била пречка за врска, но Дејмон и тогаш покажал дека е поинаков – и тоа на најдобар можен начин.

Лусијана била самохрана мајка, а Дејмон ѝ рекол: „Ми се допаѓа што си мајка и што тоа ти е приоритет“.

Таа подоцна неговиот гест го прокоментира вака:

„Некои мажи можеби ќе реагираа поинаку и ќе помислеа дека тоа е комплицирано, но за него не беше“.

Нејзината ќерка Алексија Баросо (27) ја одгледал како свое дете. Со сопругата добија уште три ќерки – Изабела (20), Џија (17) и Стела (15).

Имињата на сопругата и четирите ќерки ги истетовирал на десната рака.

„Јас сум обичен средовечен човек“

Бракот со Лусијана Баросо, жена која не е дел од светот на шоу-бизнисот, му овозможил приватниот живот да го зачува далеку од очите на јавноста. Не дава повод за негативни написи за својот брак, бидејќи не прави ништо за на тој начин да привлекува внимание или да биде „интересен“.

Беше категоричен: „Не долевам масло на огнот, не ја изневерувам сопругата и не постои ништо лошо за што би можело да се пишува. Дури и кога новинарите би ме следеле, би ја добиле истата приказна – приказната за средовечен оженет маж со четири деца. Додека не им понудам нешто ново, медиумите нема да покажуваат голем интерес за мене“.