Животот често пишува необични приказни, а понекогаш е доволен само еден чекор покрај брегот на реката за заборавеното минато повторно да исплива на површина по илјада години. Токму тоа се случи овојпат, кога извесен Мирослав се нашол во центарот на вниманието откако од реката Варта извлекол вреден предмет стар околу илјада години.

Во реката Варта, во западниот дел на Полска, е пронајден исклучително добро сочуван средновековен меч, пренесува „Notes from Poland“.

Меч од 11. век

Експертите утврдиле дека мечот потекнува од 11. век, од времето на првите владетели на полската држава од династијата Пјаст. Поради тоа, тој се смета за едно од најзначајните археолошки откритија во регионот во последните неколку години.

Вредниот предмет од коритото на реката во близина на градот Вронки го извлекол локалниот жител Мирослав Тухолски. Тој го предал во Регионалниот музеј во Вронки, каде што археологот Ришард Пјетжак го прегледал и потврдил дека станува збор за автентичен меч од 11. век, пренесува „Archaeology Magazine“.

По откритието, музејот го известил Покраинскиот завод за заштита на културното наследство, а градоначалникот на Вронки најавил дека општината ќе ги финансира стручните анализи и конзерваторските работи.

Тие ќе бидат спроведени во Музејот „Никола Коперник“ во Торун, каде што оружјето ќе биде соодветно заштитено и зачувано за идните генерации.

Мечот потекнува од раниот период на полската држава, кога со областа Голема Полска владеела династијата Пјаст. Токму таму, во 966 година, Мјешко I го прифатил христијанството, настан што се смета за крштевање на Полска, додека во 1025 година Болеслав I Храбар бил крунисан во блискиот град Гњезно како прв полски крал. Династијата Пјаст владеела со земјата сè до 1370 година.

Вредно откритие

Иако староста на мечот е прецизно утврдена, неговата приказна и натаму останува најголемата мистерија. Во музејот се прашуваат дали му припаѓал на средновековен воин кој живеел на тоа подрачје или, пак, намерно бил фрлен во реката како дел од древен ритуален обред.

„Каква е историјата на ова оружје? Дали му припаѓало на воин од раниот среден век или било фрлено од брод во реката Варта како дел од ритуален чин? Тоа веројатно никогаш нема да го дознаеме. Но знаеме дека нашиот регион сè уште крие многу тајни“, соопштија од Регионалниот музеј во Вронки.

Оттаму додадоа дека одговорниот потег на Тухолски овозможил ова вредно откритие да остане достапно за јавноста и за идните генерации. Во музејот очекуваат мечот да биде изложен пред посетителите за неколку месеци.

Ова не е изолиран случај. Минатата година еден рибар од реката Висла извлекол уште еден средновековен меч, до кој можело да се дојде благодарение на исклучително нискиот водостој.

На почетокот на 2025 година, во јужниот дел на Полска бил откриен римски меч стар околу 2.000 години, а една година претходно бил пронајден средновековен меч за кој се верува дека е од викиншко потекло. Исто така, минатата година, на дното на едно езеро била пронајдена совршено зачувана илјадагодишна дрвена скулптура на човечко лице, пренесува „N1info.ba“.

Експертите предупредуваат дека сè почестите суши истовремено претставуваат и можност и закана за археолошкото наследство. Нискиот водостој открива предмети кои со векови биле скриени под водата, но нивното изложување на воздух го зголемува ризикот од оштетување, бидејќи водата природно зачувува голем дел од археолошките остатоци.