Ова старинско јадење – цицвара, се подготвува брзо, не бара скапи состојки, а е идеално за вечера кога сакате нешто топло, заситно и лесно сварливо. Токму затоа многумина ѝ се враќаат.

Рецепт за цицвара:

Состојки

За подготовка на домашна цицвара ќе ви биде потребно:

• 2 дл млеко;

• 300 до 400 грама кајмак или младо сирењe;

• 8 лажици бело пченкарно брашно; 

• 1 лажица маст (по желба);

• 1 лажичка сол;

• 1 лажица мед (по желба).

Многу искусни готвачи тврдат дека токму квалитетот на кајмакот е клуч за совршен вкус. Колку е кајмакот помасен и покремаст, толку цицварaта ќе биде побогата и повкусна.

Подготовка

Во тенџере сипете вода, млеко и маст, па загревајте додека не зоврие. Потоа додајте кајмак или сирење и сол, и мешајте додека состојките целосно не се соединат.

Кога смесата повторно ќе почне да врие, намалете ја температурата и постепено додавајте го пченкарното брашно. Важно е брашното да се додава полека, со постојано мешање, за да не се создадат грутки.

Продолжете да готвите десетина минути, сè додека смесата не стане густа и компактна. Кога ќе забележите дека цицварaта лесно се одвојува од дното на тенџерето, јадењето е готово за сервирање.

Како се служи?

Цицвара е највкусна додека е уште топла. Може да се послужи со чаша јогурт, кисело млеко или домашна павлака. Одлично се комбинира и со сезонска салата, а оние што сакаат спој на слатко и солено може одозгора да додадат и малку мед.

Едноставна, хранлива и полна со домашен вкус, цицварата е доказ дека најубавите јадења често се токму наједноставните.