Невеста која патувала од Индијана до Мајорка со својот вереник и најблиските пријатели за да ја оствари својата свадба од соништата, доживеала вистински кошмар. На денот на церемонијата, таа се разбудила со каснувања од комарци на лицето и рацете. Ауџа Синг (26) и нејзиниот вереник Ники (30) планирале интимна свадба со девет гости во лозје покрај историска капела од 12 век, но сè било нарушено од наезда од инсекти.

Неочекувани гости во пресрет на свадбата

Двојката требало да се венча во идиличната околина на лозјето Бодега Сон Пуиг.

„Пред венчавката почувствував огромна возбуда и благодарност. Бев трета двојка која некогаш се венчала во таа капела“, вели Ауџа.

Но, ноќта пред големиот ден донел неочекуван пресврт. Додека престојувале во вилата на врвот на планината, Ауџа и Ники се бореле со жештините. Клима-уредот, кој често има ограничено ладење во Европа, престанал да работи откако се обиделе дополнително да го зајакнат. Поради неподносливата топлина решиле да спијат со отворена врата, иако Ауџа била загрижена за инсектите.

Во текот на ноќта го слушнала зуењето, но не обрнала премногу внимание на тоа. Сепак, до утрото, собата била полна со комарци. Ауџа изброила повеќе од 20 убоди на лицето и повеќе од 40 на рацете, додека Ники имал уште повеќе. Сè сподели во видео на TikTok, каде што во описот напишала дека „го губи разумот“.

Од шок до справување

„Кога првпат ги видов, помислив дека е шега. Веднаш тргнав во акција. Мислам дека првиот ден зедов пет апчиња за алергија, нанесов крем, нанесов мраз и едноставно решив да продолжам“, рекла Ауџа.

На почетокот, убодите беа подносливи, но до утрото на свадбата станале „големи, црвени, отечени и екстремно чешале“, а преку ноќ се влошиле уште повеќе. Нејзините пријатели се обиделе да ја смират.

„Сите беа прилично опуштени и ми велеа: „Во ред е, сепак ќе изгледаш прекрасно“. Се обидуваа да ме уверат дека убодите нема да се видат, што донекаде помогна“, рекла таа.

Иако првично планирала минимална шминка, на крајот морала да нанесе повеќе слоеви пудра за да го прикрие црвенилото. Така, трагите на лицето станале речиси невидливи, додека на рацете сè уште биле забележливи. Пријателките дури се обиделе да импровизираат ракави од резервен превез, но на крајот невестата решила да ја прифати ситуацијата.

Среќен крај и покрај сè

„На крајот, си реков дека ништо нема да ми го расипе расположението и денот кога ќе се омажам за личноста што ја сакам. Го сфатив тоа како мала, слатка лоша среќа што ќе го направи овој ден уште понезаборавен“, рекла Ауџа.

И покрај хаотичниот почеток и дополнителните незгоди, како што е дупната гума на патот кон прославата, церемонијата завршила како што сакале.

„Нашата свадба беше како бајка. На крајот, единственото нешто што беше важно беше што се венчавме“, заклучила таа.