Американскиот музичар Оливер Три загина во хеликоптерска несреќа во Бразил на 32-годишна возраст, според извештаите. Два хеликоптери се судрија над Рио де Жанеиро во неделата наутро и се урнаа во западната зона на градот, при што загинаа сите шест лица што се наоѓаа во нив, вклучувајќи го и Три, објавија неколку бразилски медиуми.
Воената противпожарна служба на Рио де Жанеиро соопшти дека еден од хеликоптерите се урнал врз автосалон во кој биле паркирани неколку електрични возила, што предизвикало пожар кој потоа бил изгаснат.
Two helicopters collided midair over Rio de Janeiro, killing all six people on board, according to firefighters. One of the aircraft crashed into a car dealership parking lot, sparking a fire among several electric vehicles that was later extinguished. pic.twitter.com/1oxe8a7kU8
— New York Post (@nypost) June 14, 2026
Надлежните соопштија дека е во тек истрага со која ќе се утврди причината за судирот. Три, 32-годишник кој престојувал во Бразил во рамките на светската турнеја, се наоѓал во еден од хеликоптерите што се урнаа, при што загинаа сите лица во леталата, изјави полициски извор за „AFP“.
Алтернативниот пејач и интернет-личност беше наведен како едно од шесте лица на списоците на патници на двете летала што ги сподели изворот, кој рече дека жртвите сè уште не можат формално да бидат идентификувани бидејќи во несреќата тешко изгореле. Меѓу патниците што биле со пејачот имало бразилски музички продуцент, аргентински режисер на видеоспотови и аргентинскиот јутјубер Гаспар Прим, познат на интернет како Гаспи, пишува „The Guardian“.
Хеликоптерите се судриле во воздух над западното предградие Рекреио дос Бандеирантес, пред да се урнат на паркингот на автосалон за електрични автомобили и да запалат околу 20 автомобили, според наводите на пожарникарите. Во едниот хеликоптер имало пет лица, а во другиот само пилотот. Никој не преживеал.
Три, препознатлив по својата карактеристична фризура и интернет-имиџ, беше познат по песните „Life Goes On“, „Miss You“ и „Alien Boy“. На „Spotify“ има повеќе од 11 милиони месечни слушатели, а неговите најпопуларни песни се преслушани повеќе од 700 милиони пати. Во текот на светската турнеја требаше да одржи повеќе од 70 концерти во 30 земји на седум континенти. Настапи во Буенос Аирес, Аргентина, на 4 јуни, а во саботата на „Инстаграм“ сподели видео на кое игра фудбал во еден бразилски кварт.
Во 2024 година беше номиниран за наградата „Brit Award“ во категоријата меѓународна песна заедно со германскиот продуцент Робин Шулц за нивната песна „Miss You“. Песната го достигна третото место на британската листа на синглови. Во 2020 година го собори Гинисовиот светски рекорд за најголем тротинет, висок 4,16 метри и долг 3,13 метри. Според интернет-страницата на „Guinness World Records“, тој подвиг бил остварен за да го „исполни животниот сон“.
