Министерот за економија и труд, Бесар Дурмиши, ги повика компаниите кои направиле инвестиции да ја искористат финансиската поддршка предвидена со закон, со цел да ги развиваат своите бизниси и да ја зголемат конкурентноста на пазарот. Рокот за аплицирање е продолжен до 15 јуни.
Министерот за економија и труд, Бесар Дурмиши, денеска ги повика сите компании кои реализирале инвестиции и ги исполнуваат условите предвидени со Законот за финансиска поддршка на инвестиции да ја искористат можноста за државна поддршка и навремено да поднесат барање до Министерството за економија и труд.
Министерот потсети дека рокот за поднесување на барањата е продолжен до 15 јуни и ги охрабри компаниите да ја искористат оваа можност за дополнителна поддршка на нивните развојни планови.
„Законот за финансиска поддршка на инвестиции е една од најзначајните алатки преку кои државата ги поддржува компаниите што инвестираат, отвораат нови работни места и ја зголемуваат својата конкурентност. Ги повикувам сите компании кои имаат реализирано инвестиции и ги исполнуваат условите да аплицираат најдоцна до 15 јуни и да ја искористат поддршката што им стои на располагање. Особено ме радува што успешни компании од Општина Чаир, како ONE Cable, Pikasa, Koral Group и MSA Company, и во претходните години успешно ги користеле мерките од Законот и преку нови инвестиции придонеле за развој на локалната и националната економија“, изјави Дурмиши.
