Поранешниот градоначалник на Општина Карпош, Стевчо Јакимовски, на 2 јули треба да се јави во Казнено-поправната установа „Скопје“ во Шуто Оризари за издржување на правосилно изречената затворска казна од една година.
Од Основниот кривичен суд Скопје информираа дека судија за извршување на санкции му издал упатен акт на осудениот С.Ј., со кој е задолжен на наведениот датум да се пријави во затворот.
„Судија за извршување на санкции од Кривичниот суд Скопје на осудениот С.Ј. му издаде упатен акт за издржување на едногодишната казна затвор и истиот е упатен да се јави во Затвор Скопје на 2 јули 2026 година“, соопштија од Судот.
Пред неколку дена, по одлука на Апелационен суд Скопје, Јакимовски правосилно беше осуден на една година затвор во предметот што се однесува на изградбата на општинската зграда во Карпош.
Сепак, поранешниот градоначалник нема да ја издржува целосната едногодишна казна зад решетки, бидејќи во пресметката на казната му се признава времето поминато во притвор. Според достапните информации, во казната се засметани петте месеци што ги поминал во притвор, што значи дека му преостануваат уште околу седум месеци за издржување во затворската установа во Шуто Оризари.
