„Meta Platforms“ воведе претплати за „Instagram“, „Facebook“ и „WhatsApp“. Истовремено, компанијата тестира премиум понуди наменети за компании, креатори и корисници на своите производи базирани на вештачка интелигенција.

„Facebook Plus“, „Instagram Plus“ и „WhatsApp Plus“ се воведени на глобално ниво, а во развој се и дополнителни пакети за компании, креатори и производи поврзани со вештачка интелигенција. Сите тие се обединети под името „Meta One“.

„Meta“ уште претходно оваа година потврди дека планира воведување претплати, со цел да ги диверзифицира приходите и да ги надомести растечките трошоци поврзани со AI технологиите. Компанијата годинава очекува капитални инвестиции меѓу 125 и 145 милијарди американски долари, најмногу насочени кон AI дата-центри.

„Instagram Plus“ и „Facebook Plus“ ќе чинат 3,99 долари месечно, додека „WhatsApp Plus“ ќе биде достапен за 2,99 долари месечно.

„Instagram Plus“ и „Facebook Plus“ ќе нудат дополнителни функции, вклучувајќи подобрена аналитика, статистика за повторно гледање на приказни, проширен досег до публика и можности за персонализација на профилот.

„WhatsApp Plus“ ќе биде фокусиран на персонализација, со премиум налепници, прилагодени мелодии за ѕвонење и теми за апликацијата.

Претплатата за „Meta One“ би можела да се движи меѓу 7,99 и 19,99 долари месечно. Новата услуга најпрво ќе биде тестирана во Сингапур, Гватемала и Боливија, почнувајќи од следниот месец.

Пристигнува „Berkshire Hathaway“

Од друга страна, „Alphabet“ има намера да собере 80 милијарди долари преку акции, вклучително и инвестиција од „Berkshire Hathaway“.

Во април компанијата ја зголеми годишната прогноза за капитални расходи за дополнителни 5 милијарди долари, на вкупно меѓу 180 и 190 милијарди долари.

Матичната компанија на „Google“ ќе му продаде на „Berkshire Hathaway“ акции во вредност од 10 милијарди долари преку приватен пласман. Трансакцијата вклучува 5 милијарди долари во обични акции од класа А по цена од 351,81 долари по акција, како и 5 милијарди долари во акции од класа Ц по цена од 348,20 долари по акција.

Минатиот месец „Berkshire Hathaway“ повеќе од тројно го зголеми својот удел во „Alphabet“ и со инвестиција од 16,6 милијарди долари стана еден од најголемите инвеститори во обичните акции на компанијата.

„Alphabet“ има за цел да обезбеди дополнителни 30 милијарди долари преку паралелни јавни понуди поддржани од инвестициски банки, рамномерно распределени меѓу депозитарни акции поврзани со задолжително конвертибилни приоритетни акции и акции од класа А и класа Ц.

Дополнително, компанијата планира во третото тримесечје да започне програма за понуда на пазарот вредна 40 милијарди долари, што ќе ѝ овозможи постепено да продава акции од класа А и класа Ц во подолг временски период.

Во текот на изминатата година, „Alphabet“ обезбеди повеќе од 85 милијарди долари долг на шест валути и пазари, со што вкупниот долг на компанијата надмина 100 милијарди долари.