Д-р Мохамад Ало, кој на „ТикТок“ се претставува како „американски кардиолог“, има речиси 270.000 следбеници со кои редовно споделува совети за здравје на срцето. Во неодамнешно видео порача:

„Како кардиолог, ќе ви откријам неколку намирници кои апсолутно никогаш не би ги јадел.“

Некои намирници го зголемуваат LDL, а други HDL холестеролот

Тој објасни:

„Некои намирници, кога ги јадете, го зголемуваат вашиот LDL холестерол, ги затнуваат артериите и предизвикуваат срцеви удари, мозочни удари, деменција, заболување на периферните артерии, болести на бубрезите и разни други проблеми.“

LDL, односно липопротеин со ниска густина, е познат и како „лош холестерол“. Тој може да предизвика насобирање наслаги во артериите, што може да доведе до срцев или мозочен удар.

Од друга страна, липопротеинот со висока густина, HDL, е „добриот“ облик на холестерол. Тој го враќа вишокот холестерол во црниот дроб, каде што се разградува и се отстранува од крвотокот.

Путер, сланина, сирење, свинска маст …

„На прво место е путерот. Тој во основа е речиси чиста заситена маст. Кога јадете путер, LDL расте и артериите почнуваат да се затнуваат“, предупреди д-р Ало.

„Во истата категорија спаѓаат и другите заситени масти: сирење, сланина, свинска маст, прочистен путер (ghee), кокосово масло, лој, масни делови од стекови и пилешка кожа. Сите тие заситени масти го зголемуваат LDL холестеролот и на тој начин предизвикуваат срцеви заболувања“, додаде тој.

Намирници кои содржат заситени масти

Британската Национална здравствена служба („NHS“) препорачува просечен маж да не внесува повеќе од 30 грама заситени масти дневно, а жена не повеќе од 20 грама.

Намирници кои содржат заситени масти се: путер, „ghee“, лој, свинска маст, кокосово и палмино масло, колачи, бисквити, масни парчиња месо, колбаси, сланина, сувомеснати производи како салама и панцета, сирење, печива како пити и кроасани, павлака, „crème fraîche“, кисела павлака, сладолед, кокосово млеко и павлака, млечни напивки, како и чоколадо и чоколадни намази.