[ФОТО/ВИДЕО] „Набљудувавме нешто што ниеден друг човек никогаш не го видел“: На дното на океанот пронајдено мистериозно суштество

„Малечок е! Син е!“ може да се слушне како вели возбудената научничка кога првпат го здогледала азурниот мекотел на снимката пренесена од подморницата, пренесе „France24“.

Тимот од Фондацијата „Чарлс Дарвин“ открил нов вид октопод на речиси 1.800 метри под површината, покажува истражување објавено во списанието „Zootaxa“.

„Веднаш знаев дека станува збор за нешто навистина посебно“, изјавила експертката за октоподи Џенет Војт, од која било побарано да го идентификува овој необичен вид.

На почетокот, кустоската на Природонаучниот музеј „Филд“ во Чикаго морала да се задоволи само со фотографии од животното. Потоа по пошта го добила неговото зачувано тело.

„Кога пристигна, си помислив: ’О, Боже! Прекрасно е‘“, рекла Војт.

Веднаш се заинтересирала бидејќи најблискиот познат октопод со таков облик живее покрај брегот на Уругвај, во друг океан, од другата страна на Јужна Америка.

Обично, за да се опише нов вид октопод, потребно е примерокот да се расече за да се испитаат устата, клунот, забите и останатите делови.

„Имавме само еден примерок, па не сакав да го сечам на парчиња“, рекла Војт.

Наместо тоа, тимот од Музејот „Филд“ користел КТ-скенери за да направи илјадници рендгенски снимки, а потоа ги споил во 3Д-модел на октоподот, откривајќи ја неговата внатрешност.

„Ништо не може да се спореди со ден поминат во набљудување на нешто што ниеден друг човек никогаш не го видел“, изјавила Стефани Смит, раководителка на рендгенската лабораторија во Музејот „Филд“.

Новиот вид, наречен „Microeledone galapagensis“, се издвојува и по други работи освен по сината нијанса, за која се верува дека е најретката боја во природата. Се чини дека овој октопод е најмалиот припадник на семејството „Megaleledonidae“, чии членови обично се многу поголеми и живеат во Јужниот Океан, кој го опкружува Антарктикот.

„Неговите набиени краци со само еден ред пипала го издвојуваат од повеќето октоподи што ни се познати“, рекла Војт.

Дури и меѓу „другите видови со кратки краци и еден ред пипала, го издвојуваат неговата обоеност и мазната кожа на грбот“, додала таа.

Додека октоподот на грбот е светлосин, од долната страна е „многу темновиолетов“, рекла Војт.

„Сметаме дека ваквата боја му помага да остане безбеден. Ако октоподот фати плен што емитува светлина, таа светлина би можела да привлече грабливци кои потоа би можеле да го изедат октоподот“, објаснила таа и додала:

„Затоа октоподот ја префрла својата темно обоена опна врз пленот и така се штити“.

Изненадувачки, не е невообичаено да се пронајдат нови видови октоподи во длабокото море – особено во области што не се добро истражени, а такви се огромен дел од океанското дно.

„Кога би го зеле целото копно на Земјата и би го споиле, тоа не би го покрило Тихиот Океан“, истакнала Војт.

Додала дека последен пат видела нов вид октопод во 2023 година, покрај брегот на Костарика.