Сулошова пред неколку години стана хит на социјалните мрежи, односно откако почнаа да се шират нејзините фотографии од птичја перспектива. Тоа не е чудно со оглед на тоа што оваа мирна општина, сместена триесетина километри северозападно од Краков во Малополското Војводство, навистина изгледа нереално.
Ако ја погледнете од височина, ќе видите стотици куќи наредени од двете страни на истиот пат, кој се протега на околу девет километри. Секој сопственик покрај куќата има и тесно, но долго парче земјоделско земјиште, што на целата глетка ѝ дава дополнителна доза бајковитост.
Бојата на земјиштето варира од светложолта до темнозелена и кафеава — во зависност од тоа која земјоделска култура е засадена на него. Меѓу жителите особено се популарни компирите и јагодите, па дури се организираат и посебни денови посветени на тие намирници.
Кога ќе се „спуштите на земја“, ќе ве пречека едноставна полска општина со околу 6 илјади жители. Повеќето главно се занимаваат со земјоделство, а животот е многу мирен.
Во Сулошова има неколку продавници што продаваат локално овошје и зеленчук. Тука се и пекарница, банка, здравствен дом, градско собрание, автобуска станица и само еден ресторан, кој се затвора во попладневните часови, по што младите желни за забава обично одат во соседните места. Омилена активност е — озборувањето. Секој го знае секого во тоа мало место и со задоволство се прераскажуваат информации за соседите.
Туристите што доаѓаат во Сулошова сакаат да ги истражуваат локалните карпи, клисури и повеќе од 400 пештери во рамките на Националниот парк Ојцов. Ако се најдете во близина, задолжително разгледајте го и замокот „Pieskowa Skała“, кој го изградил полскиот крал Казимир Трети, како и Херкуловата палка — варовнички столб висок околу 30 метри.
