Итан Лапјер пронашол досетлив начин да ја расположи својата сопруга за време на третиот триместар од нејзината трета бременост.

Нејзините пораки, во кои се жали на трудничките тегоби, ги претворил во песна и снимил видео што стана вирално.

Песна создадена од пораки за труднички маки

Итан Лапјер (36) и неговата сопруга Сара (32) споделуваат делови од својот живот на „TikTok“, а на 22 април објавиле видео што многу брзо го освои интернетот.

Таткото на две деца решил да искористи популарен тренд и да ги претвори текстуалните пораки на својата сопруга за тоа како се чувствува во поодмината бременост во песна.

„Се чувствувам како да умирам, толку сум уморна и ме боли главата. Мислам дека сум гладна, но не можам да јадам“, гласи првиот стих од песната, додека на видеото се гледа Итан како ја движи главата во ритамот на музиката пред да ја сврти камерата кон сопругата, која се смее.

Во другите стихови има реченици како:

„Умирам. Устата ми е ужасна и грбот ме убива. Не сум гладна, ама не знам што да правам“

и

„Жал ми е што ти се жалам, само навистина умирам.“

Во песната се нашол и незаборавниот стих:

„Тажна сум што ме изневери во сон.“

„Мораш да го објавиш ова“

Итан за магазинот „People“ открил дека на почетокот воопшто не планирал да го објави видеото, но сопругата го наговорила.

„Видов дека се шири трендот ’претворање пораки во песна‘ и си помислив дека би било смешно тоа да го направам со пораките од мојата бремена сопруга“, изјавил тој.

„Всушност, само сакав да ја насмеам и воопшто не планирав да го објавам, но кога ѝ го покажав, толку многу се смееше што ми рече: ’Мораш да го објавиш ова‘. Така отидовме до мојот камионет и го снимивме видеото со песната“, се присетува Итан.

Тој вели дека песната ја направил со помош на апликација, но му било потребно време за пораките да ги обликува во смислена целина.

„Навистина сакав тоа да биде вистинска песна со строфи, предрефрен, рефрен и слично, па ми требаа неколку часа“, споделил тој.

Никој не бил поголем обожавател на песната од Сара, која, според неговите зборови, „се смеела до солзи“.

„Како што реков, третиот триместар од нејзината трета бременост беше тежок и само сакав да ја насмеам и да ѝ дадам малку комично олеснување“, објаснил тој.

Снимил и продолжение

На прашањето дали ќе има нови песни, Лапјер вели дека направил уште една, но по тоа го остава своето „композиторско перо“.

„Не планирав да направам уште една песна, но многу луѓе бараа повеќе. Затоа направив продолжение засновано на моите одговори на пораките од мојата бремена сопруга, но мислам дека тоа е сè од мене во овој жанр ’пораки во песна‘“, вели тој.

„Беше навистина забавно, ми се допаѓа што се вклопивме во трендот на наш начин и луѓето навистина се пронајдоа во тоа — не сакам ништо да форсирам и да претерувам. Никогаш не вели никогаш, но засега мислам дека ова беше мојата лебедова песна.“