[ФОТО/ВИДЕО] Има само 17 години и цел свет „под нозе“: Која е Монро, француската претставничка што ја разбранува Евровизија?

Затоа впечатокот е уште посилен кога ќе слушнете одличен изведувач кого би сакале повторно да го чуете.

На 70. Евровизија има изведувачи од различни профили и жанрови, но веднаш се издвои најмладата учесничка, која нè воодушеви со својот глас на прво слушање.

Станува збор за француско-американската пејачка Монро Вата Ригби, која под името Монро настапува за Франција.

Во моментов е шеста на евровизиските обложувалници, а во второто полуфинале нејзиниот настап беше проследен со силен аплауз.

Штом почна да ја изведува песната, беше јасно дека станува збор за голем талент и прекрасен глас. Има само 17 години, што уште повеќе придонесува за „вау“ впечатокот, бидејќи треба да се излезе на сцената на најпознатиот музички настан и да се отпее без трема и перфектно.

Инаку Монро го привлекла вниманието на француската јавност во 2025 година, кога победила во емисијата „Prodiges“, талент-шоу на француската телевизија. Тогаш ги освоила и жирито и публиката со својот моќен глас, талент и харизма, а оваа победа била пресвртница во нејзината кариера и ѝ ги отвори вратите понатаму.

Пораснала меѓу Франција и САД, а уште од мала знаела дека ќе се занимава со музика. Родена е во Солт Лејк Сити, во сојузната држава Јута, а детството ѝ минувало во играње тенис со брат ѝ и пеење во црковен хор.

Како што пишуваат странските медиуми, уште од мала знаела дека сака да се занимава со музика, а до тоа дошла на трогателен начин.

Како дете седела со семејството во црква и одблизу видела како музиката влијае врз нејзините родители. А кога почнала да пее во црковниот хор, можела од другата страна да види како тоа им носи радост, но и солзи на некои луѓе.

„Целосно се вљубив во таа идеја дека нешто може да ве допре на начин што дури и самите не го разбирате. И така, оттогаш само сакав да продолжам да учам. Потоа почнав да одам на часови, а потоа почнав да се занимавам со театар. Почнав со музички театарски претстави и со некои оперски претстави“, раскажала Монро, пренесе „deseret.com“.

Нејзиниот дебитантски албум наиде на добри критики, а сигурни сме дека самото појавување на Евровизија ќе ѝ отвори многу врати и ќе биде одличен чекор кон нејзината меѓународна кариера.

„Ова натпреварување е дел од мојот живот уште од детството, а сега, на 17 години, целосно сум свесна за довербата што ми е укажана. Со гордост влегувам во натпреварувањето, претставувајќи ја Франција, земјата што ме обликуваше и ме инспирираше“, изјавила Монро.