Оваа приказна публиката веќе добро ја познава благодарение на филмските адаптации, особено верзијата од 2004 година, во која главната улога ја толкувал Дензел Вашингтон.

Новата серија, сепак, не се обидува само да го повтори познатиот образец, туку приказната за одмаздата и искупувањето ја сместува во поинаква емотивна рамка. Во центарот е Џон Криси (Јахја Абдул-Матин II), поранешен припадник на специјалните сили кого го прогонува траума од минатото и мисија што завршила кобно.

Поранешен специјалец на работ на слом

За разлика од претходните верзии, Криси во оваа адаптација на Нетфликс не е обележан со алкохолизам, туку со посттрауматско стресно нарушување, чувство на вина и длабока осаменост. Кога гледачите првпат го запознаваат, станува збор за човек кој ги изгубил поддршката, работата и вербата дека може да се извлече од сопствената темница.

По обидот за самоубиство, во неговиот живот влегува поранешен колега кој му нуди шанса за нов почеток и го повикува во Рио де Жанеиро. Таму Криси се обидува повторно да застане на нозе, но набрзо се наоѓа вовлечен во приказна што ќе го натера да се соочи и со сопствените демони и со бруталниот криминален свет.

Врска што менува сè

Клучен лик во серијата е По, млада жена која ја толкува Били Буле. Таа станува емотивната пресвртница за Криси и личност преку која тој повторно пронаоѓа смисла. Откако трагедија ќе го погоди нејзиното семејство, Криси и По тргнуваат во потрага по одговорните.

Серијата така ги задржува основните мотиви на познатата приказна: ранет заштитник, заменска семејна врска, вина, одмазда и можност за искупување. Но, за разлика од класичните акциски трилери во кои јунакот главно функционира како непобедлива машина, оваа верзија повеќе инсистира на неговата психолошка ранливост.

Рио како опасна сцена

Дејството ги води гледачите низ Рио де Жанеиро, од фавелите до затворените кругови на моќта во кои се кријат оние кои ги влечат конците. Како што мисијата се проширува, Криси околу себе собира група помошници, а потрагата по вистината станува сè поопасна.

Улогата на Џон Криси ја презеде Јахја Абдул-Матин II, познат по проектите „Aquaman“, „Watchmen“ и „Wonder Man“. Во оваа серија тој добива можност да покаже поинаков распон: физички е уверлив како акциски протагонист, но улогата од него бара и постојано присуство на внатрешна напнатост, тага и контрола.

Што велат критичарите?

Првите критики особено ја истакнуваат изведбата на Абдул-Матин. „Гардијан“ наведува дека неговото присуство е силно и дека уверливо го носи ликот на човек кој делува како некој кој во борба не губи лесно, но притоа не го сведува само на акциски јунак.

Сепак, истата рецензија предупредува на најголемиот проблем на серијата: нејзиниот сериозен, мрачен тон понекогаш се судира со акциските сцени кои се „изразито претерани“. Критичарот Џек Сил истакнал дека „Man on Fire“ сака да биде потажна и посериозна верзија на одмазднички трилер, но и понатаму содржи сцени што се поблиски до жанровски спектакл отколку до психолошка драма.

И покрај таа забелешка, „Man on Fire“ би можел да ги привлече гледачите кои сакаат мрачни акциски трилери со нагласена емотивна заднина.