Овогодишната Мет Гала, најгламурозниот моден настан на годината, беше обвиена со бизарна контроверзија. Во гротескен протест насочен против копретседавачот на настанот, основачот на Амазон, Џеф Безос, персоналот на Метрополитен музејот на уметност откри стотици шишиња исполнети со течност налик на урина, скриени во просториите на музејот во пресрет на големата вечер, пренесува „NY Post“.

Овој необичен протест, поврзан со обвинувањата дека работниците во магацините на Амазон се принудени да уринираат во шишиња наместо да користат паузи за тоалет, се случи во момент кога незадоволството поради учеството на милијардерот на овој добротворен настан достигна точка на вриење низ Њујорк.

Зад сè стои активистичкиот колектив „Everyone Hates Elon“, самопрогласена антимилијардерска група која се финансира со донации од околу илјада луѓе ширум светот. Групата ја презеде одговорноста за поставување на околу триста шишиња наполнети со вода и боја за храна за течноста да наликува на урина, со што ја ескалираше својата повеќедневна кампања против Безос и корпоративните врски на Мет Гала.

Во соопштението што го придружуваше нивниот чин, групата наведе: „Основачот на Амазон и олигарх Џеф Безос токму ја заврши својата пред-забава за Мет Гала во својот пентхаус и се подготвува за големата вечер“.

Додадоа: „Не можевме да му дозволиме да ги искористи славните личности и модата за да ги сокрие своите злосторства. Наместо тоа, ние ги разоткриваме“.

Според наводите на групата, „стотици шишиња со урина“ биле поставени низ целиот музеј, заедно со натписи и инсталации осмислени да ги исмеваат условите со кои се соочуваат работниците на Амазон. Една особено провокативна инсталација означила група пластични шишиња како „Мет Гала ВИП тоалет“, со натпис: „Поставено во чест на претседавачот на Мет Гала Џеф Безос. Само напред, доволно е добро за неговите вработени“.

Протестна кампања низ градот

Освен поставувањето шишиња, демонстрантите организирале и „Црвен тепих на отпорот“ неколку блока подалеку од музејот. Во деновите пред галата, градот бил преплавен со протестни пораки. На излозите на затворени продавници се појавиле плакати со фотографија од шише наполнето со урина на црвен тепих под блицови на фотоапарати и порака: „Бојкотирајте ја Мет Гала на Безос. Овозможена преку експлоатација на работниците“.

Активистите исто така проектирале видео интервјуа со работници на Амазон на фасадите на некои од најпознатите њујоршки згради, вклучувајќи ги Епмајер Стејт Билдинг и Крајслер Билдинг, како и на пентхаусот на Безос на Петтата авенија, повикувајќи на бојкот на она што го нарекоа „моден театар поддржан од милијардери“. Поради протестите, Џеф Безос наводно го избегнал црвениот тепих и влегол во музејот преку спореден влез, додека неговата сопруга, Лорен Санчез, сама прошетала по црвениот тепих. Овој шокантен протест на Мет Гала го истакна растечкиот тренд на активизам насочен кон корпорациите.