Познатиот германски производител на чоколадо „Ритер Спорт“ планира да намали работни места за првпат во својата 110-годишна историја. Компанијата објави дека била принудена да го направи овој потег поради лошите деловни резултати од минатата година.

„Оваа мерка ќе влијае на седиштето на компанијата во Штутгарт“, изјавил портпаролот на германската новинска агенција („dpa“). Бизнисот е погоден од растечките цени на суровините, особено какаото, енергијата и пакувањето. Компанијата, исто така, наведува дека потрошувачите се повнимателни во трошењето.

„Ритер Спорт“, познат по својата квадратна амбалажа за чоколадо што се отвора со преклопување по средината, вработува околу 1.900 луѓе во своите фабрики во Германија и низ целиот свет. Компанијата минатата година објави план за реструктуирање на трошоците.

Околу 1.000 луѓе се вработени во седиштето во Валденбух, во близина на Штутгарт, вклучувајќи нешто повеќе од 600 административни работници.

„Ритер“ сега планира да укине околу 70 административни позиции, пренесува „dpa“.

Иако ја зголемиле продажбата минатата година, компанијата останала во минус, со профит далеку под очекувањата. Загубата се припишува на високите цени на суровините.

Раст на трошоците

Ритер ги зголемиле приходите за 17,7 проценти во 2025 година, на 712 милиони евра, во споредба со 605 милиони евра претходната година.

Сепак, растот на приходите не бил доволен за да го компензира „огромниот раст на трошоците“ низ целиот вредносен синџир, се вели претходно во деловниот извештај на компанијата.

Компанијата постигнала раст на приходите благодарение на зголемувањето на цените на своите производи, додека продажбата всушност се намалила.

Цените на какаото значително се зголемија во последните години поради слабите приноси во Западна Африка. Производството беше под влијание на штетници на растенијата и неповолни временски услови, а производителите ги пренесоа зголемените трошоци на потрошувачите.

Цената на чоколадото во Германија беше во просек за 70 проценти повисока отколку во 2020 година.

Со подобра жетва, цената на какаото нагло падна неодамна, што им овозможи на некои производители да ги намалат малопродажните цени.