Далеку од популарните туристички рути и познатите летувалишта, во Тихиот Океан се наоѓа една од најизолираните држави во светот која годишно привлекува само околу 9.500 туристи. Станува збор за Кирибати, островска земја која за многу патници и понатаму е речиси непозната дестинација.

Оваа единствена држава има необична географска особина – се протега низ сите четири хемисфери на Земјата. Кирибати се состојат од 32 атоли, од кои околу 20 се населени, а вкупното население брои околу 140.000 луѓе.

Зошто и понатаму е слабо посетувано место

Иако зафаќа огромна океанска површина, нејзината копнена територија изнесува само 811 квадратни километри, што ја прави помала дури и од големи светски метрополи како Лос Анџелес или Сао Пауло. Токму таа распространетост на огромен простор дополнително придонесува за нејзината изолираност.

Нискиот број туристи не е случаен. Кирибати се соочуваат со сериозни предизвици, меѓу кои се географската оддалеченост, ограничената инфраструктура и големата ранливост на климатските промени. Сето тоа заедно влијае на тоа до оваа земја да се патува ретко и тешко.

Тешко и скапо патување

Исто така, пристапот до Кирибати е можеби најголемата пречка за посетителите. Не постојат траектни врски и единствената опција е со авион, преку долги и комплицирани рути.

Патниците обично минуваат низ чворишта како Лос Анџелес, Сингапур или Хаваи, а вкупното времетраење на патувањето надминува 24 часа, додека трошоците се на високо ниво.

Токму затоа, властите на Кирибати свесно се определуваат за модел на одржлив и „бавен“ туризам, со цел да ги зачуваат своите природни убавини, белите песочни плажи и тиркизното море кое останува речиси недопрено.

Бојно поле на тешки борби

Главниот град Тарава има и значајно место во историјата, бидејќи за време на Втората светска војна бил бојно поле на тешки борби.

На островот Бетио се одиграла една од најкрвавите битки на Пацификот, во која загинале илјадници луѓе, а на крајот победата ја однеле американските сили.