Актерката Кристина Еплгејт моментално е хоспитализирана во Лос Анџелес. Според информации од извори блиски до ситуацијата, таа била примена во болницата кон крајот на март, но точната причина за нејзиното хоспитализирање засега е непозната.

Долга борба со мултиплекс склероза

Еаплгејт се бори со мултиплекс склероза, сериозна невролошка болест, од јуни 2021 година, но не е потврдено дали нејзината моментална состојба е поврзана со дијагнозата.

Актерката претходно отворено зборуваше за своите здравствени проблеми и предизвиците со кои се соочува секојдневно.

Пауза на подкастот

Веста доаѓа кратко откако на 31 март беше објавено дека нејзиниот подкаст „MeSsy“, кој го води заедно со Џејми-Лин Сиглер, ќе направи кратка пауза поради нивните деловни обврски и промотивни турнеи.

Здравствените проблеми за кои зборуваше во своите мемоари

Портпаролот на актерката за „TMZ“ изјави дека нема понатамошен коментар за нејзината хоспитализација или медицински третман, но нагласи дека Еплгејт има долга историја на сложени здравствени проблеми за кои таа отворено зборуваше.

Кристина неодамна објави мемоари, „Ти со тажни очи“, во кои детално ги опишува секојдневните борби со болеста.

„Кога ќе се разбудам, честопати не можам доволно да ја помрднам раката за да ја дофатам чашата со вода до креветот или телефонот од полначот“, напиша актерката.

Таа, исто така, истакна дека поради болеста е поподложна на инфекции и дека тоа често води до одење во итната помош.