Можеби ќе ве изненади фактот дека староста на вашето срце не мора да се совпаѓа со бројот на години што ги имате. Во зависност од начинот на живот и здравствените навики, тоа може да биде и постаро, но и помладо од вас. Истражувањата покажуваат дека повеќето возрасни имаат „постаро срце“ отколку што треба, а кај многумина таа разлика е поголема и од 10 години, што значително го зголемува ризикот од инфаркт и мозочен удар.

Зошто е тоа важно?

Староста на срцето ја одразува состојбата на целиот кардиоваскуларен систем. Кога се совпаѓа со вашите години или е пониска, ризикот од срцеви заболувања е помал. Меѓутоа, поголемата разлика укажува на зголемено оптоварување на срцето и крвните садови.

Што всушност значи старост на срцето?

Како почетна процена може да послужи калкулатор за здравје на срцето, кој ги зема предвид годините, крвниот притисок, телесната тежина и нивото на физичка активност. Врз основа на тие податоци се проценува ризикот од кардиоваскуларни болести, односно веројатноста во иднина да доживеете инфаркт, мозочен удар, срцева слабост или болест на периферните артерии.

„На пример, ако имате 40 години, а староста на вашето срце е проценета на 56, тоа значи дека вашиот ризик е сличен на ризикот кај здрава личност од 56 години без фактори на ризик. Колку помалку фактори на ризик, толку староста на срцето е поблиску до реалната — а може да биде и пониска.“

„Ако сте загрижени за вашето срце, важно е да се обратите кај кардиолог за навремена процена на ризикот и преземање соодветни мерки“, вели Даглас Е. Вон, кардиолог и професор по медицина на Универзитетот Нортвестерн.

Тој објаснува дека современата медицина сè повеќе ја следи разликата меѓу хронолошка старост (бројот на години) и биолошка старост, која ја покажува реалната состојба на организмот.

– Постојат многу тестови кои можат да покажат колкав е ризикот од идни срцеви проблеми. Добрата вест е што на тој ризик може да се влијае и да се намали. Со тоа се занимаваме секојдневно. Искусен кардиолог може да ви помогне да го зачувате здравјето на срцето на долг рок – додава д-р Вон.

Како да го држите ризикот под контрола

За да ја одржите староста на срцето под контрола, на многу фактори на ризик можете да влијаете:

• Пушење: Еден од водечките причинители на кардиоваскуларни болести. Ги оштетува крвните садови и доведува до наслаги и тромбови.

• Покачен холестерол: Маст во крвта која, во вишок, ги затнува крвните садови.

• Покачен шеќер во крвта: Дијабетесот ги оштетува крвните садови и нервите што го контролираат срцето.

• Дебелина: Зголемен ризик од срцеви болести и дијабетес.

• Покачен крвен притисок: Го оштетува срцето и артериите со текот на времето.

Фактори на ризик на кои не можете да влијаете:

1. Години: Со стареењето природно расте ризикот од кардиоваскуларни заболувања. Срцевиот мускул може да работи побавно, а ѕидовите и залистоците стануваат подебели и помалку еластични.

2. Постоечка кардиоваскуларна болест: Ако веќе сте имале инфаркт, мозочен удар или срцева слабост, староста на срцето ќе биде поголема.

3. Семејна историја: Ако блиски членови од семејството имале срцеви заболувања во помлада возраст, вашиот ризик е повисок.

Иако на годините не можеме да влијаеме, на повеќето фактори што го „стареат“ срцето – можеме. Затоа, навремената контрола и промената на навиките не влијаат само на симптомите, туку и на реалниот ризик од сериозни кардиоваскуларни настани.

– Денес имаме начини да го намалиме ризикот од кардиоваскуларни болести – порачува д-р Вон.