Астронаутот на НАСА, Рид Вајсман, објави видео на кое се гледа моментот кога, по слетувањето на Земјата, медицинскиот тим и друг персонал ја отвораат вратата на капсулата „Orion spacecraft“, со која прелетаа и покрај Месечината.
Откако слетаа во океанот, астронаутите сè уште се наоѓаа во капсулата, а во тој момент до нив пристапија членови на медицинскиот тим и нуркачи кои се задолжени за првиот контакт со астронаутите по слетувањето.
Тие многу брзо ја отворија вратата, по што следеше воодушевување и кај астронаутите и кај нуркачите.
Нуркачите, кои воедно се и медицински лица, веднаш ја проверија општата состојба на астронаутите, а откако се уверија дека сè е во ред, им кажаа дека можат да излезат.
„Добредојдовте дома“, им порачаа нуркачите.
Медицинскиот персонал на морнарицата, кој често работи во заедници за експедициско војување, се сертифицирани нуркачи и поминуваат специјализирана обука, што ги прави експерти за декомпресиски заболувања и други подводни медицински прашања. Нивната мисија е да се грижат за припадниците на службите квалификувани за нуркање и да обезбедат тие да се безбедни за извршување нуркачки операции.
„Како горд член на подводната медицинска заедница, особено сум почестен што учествувам во оваа мисија. Животна чест ми е да стојам денес овде, подготвен да обезбедам апсолутно најдобра можна грижа за екипажот на ‘Artemis II’“, порача еден од нуркачите.
