Таа отворено зборувала за тоа како хроничниот актиничен дерматитис ѝ влијае на секојдневниот живот.

Првите симптоми се појавиле во тинејџерските години

Додека кај повеќето луѓе по предолго изложување на сонце се појавуваат изгореници, кај Сонал веќе по неколку минути може да се јави болен осип, што целосно ѝ го променило животот. Таа се присетила дека во детството имала тешка егзема, која со годините се повлекла. Но, на 17-годишна возраст, по враќањето од летување во странство, почнале да ѝ се појавуваат силни воспаленија на кожата. Во тоа време не знаела што ги предизвикува.

„Имав навистина тешка и болна реакција што никако не поминуваше“, рекла таа во емисијата „Good Morning Britain“. „Секојпат кога ќе излезев надвор, од ден на ден, чувствував силна болка и непријатност. Забележав дека ми помага кога целосно ќе се покријам со облека, но не знаев што ми е“, објаснила таа.

Сонал рекла дека со текот на времето ја забележала поврзаноста меѓу сончевите денови и влошувањето на симптомите. Сепак, како што истакнала, не можела ни да замисли дека би можела да биде алергична на дневна светлина, која, како што рекла, „е извор на живот“.

Дури на 18 години лекарите ѝ поставиле дијагноза хроничен актиничен дерматитис.

„Немам нормален живот“

Зборувајќи за тоа како болеста влијае на нејзиното секојдневие, Сонал рекла дека иако можеби на прв поглед изгледа сосема вообичаено, нејзиниот живот воопшто не е таков. „Кремот за сончање го нанесувам автоматски, исто како што пред да излеземе од дома ги земаме клучевите или облекуваме чевли“, нагласила таа.

Таа истакнала дека опасноста не се јавува само во сончеви денови. Реакцијата може да се појави и кога е облачно, дури иако надвор помине само една минута.

Откако ја дознала дијагнозата, минала низ исклучително тежок период и морала да научи да живее со новите околности.

„По дијагнозата се прашував што ќе биде со мојот живот, дали за мене сè е завршено“, рекла таа. „Дури и кога конечно дознав за што станува збор и почнав да се приспособувам, болката, непријатноста, деновите на страдање и чувството дека сопствената кожа ми е туѓа беа страшни“, раскажала Сонал.

Таа додала дека тоа било едно од најмрачните периоди во нејзиниот живот. „Оттогаш морав речиси опсесивно да почнам да се грижам за својата кожа“, нагласила Сонал.

Што е хроничен актиничен дерматитис и како се лекува?

Хроничниот актиничен дерматитис е ретка воспалителна болест на кожата поврзана со изразена чувствителност на сончева светлина, пред сè на ултравиолетово зрачење, а кај некои луѓе и на видливиот дел од светлината. Најчесто се јавува на деловите од телото изложени на сонце, како што се лицето, вратот, дланките и подлактниците, а може да предизвика црвенило, силно чешање, пецкање, осип, задебелување и лупење на кожата.

Станува збор за хронична состојба, што значи дека може да трае со години и повремено да се влошува, особено по изложување на дневна светлина. Кај дел од заболените реакциите може да ги поттикне и вештачкото осветлување, а болеста неретко се поврзува и со други облици на дерматитис и контактни алергии.

Лекувањето пред сè се темели на строго избегнување на сонце и заштита на кожата. Тоа обично вклучува секојдневно користење крем со заштитен фактор, носење заштитна облека, шапки и очила за сонце, како и избегнување престој на отворено кога зрачењето е најсилно. Важен дел од негата се и емолиенсите, односно кремовите што ја обновуваат и ја смируваат кожната бариера.

Кога симптомите ќе се влошат, лекарите најчесто препишуваат локални кортикостероиди, а понекогаш и други противвоспалителни препарати за кожата. Во потешки случаи може да се користат и лекови што делуваат врз имунолошкиот систем за воспалението да се стави под контрола.