Една од највпечатливите реклами во последните месеци ги собра имињата што доминираат во светскиот фудбал: Лионел Меси, Кристијано Роналдо, Килијан Мбапе и Винисиус Жуниор.
Една од највпечатливите реклами во последните месеци ги собра имињата што доминираат во светскиот фудбал: Лионел Меси, Кристијано Роналдо, Килијан Мбапе и Винисиус Жуниор. Четворицата снимија промотивен спот за „LEGO“, кој за рекордно време стана вирален. Во рекламата, ѕвездите седат на иста маса и составуваат коцки.
На прв поглед, сè изгледа како опуштено дружење на најголемите имиња на модерниот фудбал, но реалноста е сосема поинаква. Иако делува дека се заедно, тие ниту еден момент не поминале во иста просторија. Снимањата биле направени одвоено, а кадрите подоцна споени во единствена приказна.
И покрај тоа, посакуваниот ефект е постигнат. Рекламата стана глобален хит и привлече огромно внимание низ целиот свет. Кампањата е поврзана со претстојното Светско првенство кое ќе се одржи во Соединетите Американски Држави, Мексико и Канада, што дополнително го објаснува големиот интерес.
Сепак, она што најмногу ја заинтригира јавноста се вкупните суми што ги заработиле играчите. Според медиумските наводи, „LEGO“ вложил дури осум милиони долари во целата кампања.
Најголемиот дел од таа сума му припаднал на Кристијано Роналдо, кој инкасирал неверојатни 3,5 милиони долари. Веднаш зад него е Лионел Меси со заработка од 2,6 милиони долари. Разликата во однос на преостанатата двојка е драстична. Килијан Мбапе заработил 850 илјади долари, додека Винисиус Жуниор добил 325 илјади долари. Овие бројки јасно покажуваат колку пазарната вредност на играчите надвор од теренот може да варира.
Главната причина за ваквите разлики лежи во популарноста на социјалните мрежи. Кристијано Роналдо и понатаму е неприкосновен крал на „Instagram“ со дури 673 милиони следбеници, што го става далеку пред конкуренцијата. Од друга страна, Винисиус има околу 60 милиони следбеници, а токму таа разлика директно влијае врз висината на хонорарите.
