Сите на возраст од 17 до 45 години кои планираат да престојуваат надвор од земјата подолго од три месеци, сега мора за тоа да побараат дозвола од Бундесверот. Оваа одредба, која повторно е активирана по долго време, го привлече вниманието на јавноста дури три месеци по стапувањето на законот во сила, пишува „Welt“.

Одредба што погодува милиони

Иако минатогодишната расправа за Законот за модернизација на воената служба главно се водеше околу повторното воведување задолжителна регрутација за младите мажи, сега станува јасно дека измените навлегуваат многу пошироко. Еден член од законот, кој е во сила од јануари, теоретски би можел да влијае врз животите на милиони Германци.

Според него, на мажите на возраст од 17 до 45 години им е дозволено да ја напуштат Германија на период подолг од три месеци само со дозвола од вооружените сили. Таа одредба не е сосема нова, постоела и во претходните верзии на законот, но се применувала исклучиво во состојба на напнатост или одбрана.

Бидејќи таква состојба не била прогласена, обврската во пракса била неважечка. Но, со најновата измена, нејзината примена е проширена и на мирнодопски услови.

Што точно стои во законот?

Во Законот за воена обврска буквално пишува: „Машките лица по навршена 17-годишна возраст мора да обезбедат дозвола од надлежниот Центар за кариера на Бундесверот ако сакаат да ја напуштат Сојузна Република Германија подолго од три месеци (…)“. Дозволата е потребна и доколку престојот во странство сака да се продолжи на повеќе од три месеци или ако се продолжува веќе одобрено отсуство.

Во законот исто така стои дека дозволата за патување во странство начелно „мора да биде издадена“ ако на лицето не му претстои повик за служење воен рок. Сепак, малку е веројатно дека мнозинството од оние на кои се однесува законот воопшто се запознаени со оваа обврска, а рокот од три месеци лесно може да се достигне, на пример со студиски семестар во странство или подолг неплатен одмор.

„Војската мора да има увид кој подолго време се наоѓа во странство“

Сојузното министерство за одбрана ги потврди овие информации на барање на Германската новинска агенција (dpa), откако за нив првично извести „Frankfurter Rundschau“. Портпаролот на министерството појаснил како оваа одредба ќе се спроведува во пракса. „Со административни прописи јасно ќе дефинираме дека дозволата ќе се смета за издадена сè додека служењето воен рок е доброволно“, рекол тој.

Тој објаснил дека Бундесверот во случај на нужда мора да има увид во тоа кој подолго време се наоѓа во странство. „Овде е создадена правна основа за по потреба да се поддржи практичната примена на задолжителните елементи на новата воена служба, како што е задолжителната регрутација од 1 јануари 2026 година“, додал портпаролот.

Нејаснотии околу казните за прекршување

Министерството не откри колку барања за вакви дозволи биле примени од почетокот на годината. На прашањето како ќе се открива или казнува прекршувањето на оваа одредба, портпаролот одговорил: „Оваа одредба важеше и во времето на Студената војна и немаше практично значење, а особено не беше санкционирана“.

Тој нагласил дека „последиците од оваа одредба за младите луѓе во основа се далекусежни, особено ако се има предвид дека служењето воен рок и натаму е доброволно“. Поради тоа, како што рекол, во министерството моментално се разработуваат поконкретни одредби за исклучоци од обврската за добивање дозвола, со цел да се избегне непотребна бирократија. Исходот од тој процес сè уште не е познат.