Шведска купува системи за воздушна одбрана и одбрана од беспилотни летала во вредност од 8,7 милијарди шведски круни (околу 794 милиони евра), вклучително и од „Сааб“ и „БАЕ Системс“, објави денес шведскиот министер за одбрана.
„Поважно е од кога било да се инвестира во капацитети за воздушна одбрана“, рече Пал Јонсон.
„Заштитата од воздушни закани е висок приоритет за владата и ќе склучиме нови договори за зајакнување на одбраната на Шведска“, додаде тој.
Пакетот ќе го вклучува „Гуте II“, систем за радар и артилерија против беспилотни летала што може да биде стационарен или монтиран на возила. Наменет е за заштита на воени единици, но и критична инфраструктура како што се нуклеарни централи или железнички крстосници, објави „Ројтерс“.
Доделените средства ќе се користат и за муниција и возила, вклучително и оклопни борбени возила за пешадија од финската одбранбена компанија „Сису“.
Испораката на новата опрема ќе се изврши во 2027 и 2028 година, рече Јонсон.
Шведска, како и повеќето европски земји, брзо ја зајакнува својата одбрана по руската инвазија на Украина, а се предвидува дека нејзините воени трошоци ќе изнесуваат 2,8 проценти од БДП во 2026 година, зголемувајќи се на 3,5 проценти во 2030 година.
Шведска стана 32-та членка на НАТО во март 2024 година, откако ја заврши својата долгогодишна политика на воена неутралност, заедно со Финска.
