Хали Бери се пофали со фотографии од тренинг: Ова е рутината на која ѝ го должи импресивниот изглед на 59 години

Оскаровката во шестата деценија од животот одржува врвна физичка форма благодарение на режимот на вежбање и дисциплинираниот начин на живот. Претходно за „Today“ зборуваше за својата секојдневна рутина, при што појасни дека се темели на комбинација од различни физички активности, вклучувајќи тренинг за сила, кардио вежби, боречки вештини, јога и истегнување. Ваквиот пристап ѝ овозможува истовремено да развива издржливост, сила и флексибилност.

Бери често тренира со поддршка од својот долгогодишен тренер, при што ја нагласува важноста на разновидноста за телото постојано да се предизвикува и напредува. Рутините редовно се менуваат, со што се избегнува стагнација и се зголемува ефикасноста на тренингот.

Посебен фокус става и на закрепнувањето на организмот. Истакнува дека е важно да не се преоптоварува телото, туку да се вклучат периоди на одмор и методи на регенерација, како контрастни тушеви и истегнување по тренинг.

Покрај физичката активност, значајна улога во нејзиниот режим има и правилната исхрана. Актерката со години внимава на исхраната, што дополнително е нагласено откако ѝ бил дијагностициран дијабетес во младоста, поради што усвоила дисциплиниран и контролиран начин на исхрана.

Еден од основните совети што ги истакнува е прифаќањето на почетната несигурност при испробување нови активности. Бери нагласува дека чувството на непријатност е нормално кога се влегува во нешто ново и дека токму тој процес на учење води кон напредок и поголема самодоверба.

Актерката исто така смета дека не постои универзален вид на вежбање што одговара на сите. Наведува дека е важно да се експериментира и да се пронајде она што навистина му одговара на поединецот, наместо да се форсираат активности што не причинуваат задоволство. Како пример го наведува трчањето, за кое сфатила дека не ѝ одговара.

Поставувањето цели претставува уште еден важен сегмент од нејзиниот пристап кон тренингот. Хали објаснува дека јасно дефинираните и достижни цели ѝ помагаат да остане мотивирана, додека постепеното постигнување резултати дополнително го зајакнува чувството на успех и личен напредок.