Првиот трејлер за серијата „Harry Potter and the Philosopher's Stone“, која ја продуцира „HBO“, ги урна сите досегашни рекорди на гледаност на таа платформа, потврдувајќи го огромниот интерес на публиката за новата адаптација на популарниот книжевен серијал.
Според официјалните податоци, промотивното видео во првите 48 часа по објавувањето забележало повеќе од 277 милиони прегледи на различни платформи, со што стана најгледаниот трејлер во историјата на „HBO“ и стриминг сервисот „HBO Max“. Со тоа, претходниот рекорд е надминат за повеќе од двојно.
Серијата претставува нова телевизиска адаптација на романот на британската авторка Џ. К. Роулинг, а првата сезона го носи истиот наслов како и првиот дел од серијалот. Планирано е премиерата да се одржи во декември 2026 година, кога на гледачите ќе им биде претставена осумделна сезона.
Дејството го следи почетокот на приказната за момчето волшебник Хари Потер, кој на својот 11-ти роденден открива дека е примен во школата за магија Хогвортс, со што започнува неговата авантура во светот на волшебништвото.
Во главните улоги се појавуваат нови актери, вклучувајќи го Доминик Меклафлин како Хари Потер, Арабела Стентон како Хермиона Грејнџер и Аластер Стаут како Рон Визли, додека улогите на професорите им се доверени на познати имиња како Џон Литгоу и Џенет МекТир.
Продукцијата ја предводи Франческа Гардинер, додека режијата ја потпишува Марк Мајлод. Креативниот тим истакнува дека серијата ќе биде „поверна на книгите“ во однос на филмските адаптации, со повеќе простор за развој на ликовите и подетално прикажување на дејството.
Иако објавувањето на трејлерот предизвика голем интерес кај фановите ширум светот, дел од јавноста реагираше поделено, особено поради изборот на одредени актери и повторното започнување на франшизата.
