Германскиот министер за надворешни работи, Јохан Вадефул, ја обвини Русија дека му помага на Иран да идентификува потенцијални цели за напад, додавајќи дека нема несогласување меѓу Вашингтон и Берлин по прашањето на војната против Исламската Република.
Обраќајќи се на новинарите за време на состанокот во форматот на Г7 во Франција, Вадефул рече дека разговарал со американскиот државен секретар Марко Рубио, на кого му го претставил ставот на Берлин – дека Германија е подготвена да учествува во обезбедувањето на Ормутскиот теснец по завршувањето на непријателствата.
Германскиот министер за надворешни работи верува дека рускиот претседател Владимир Путин „цинично се надева дека ескалацијата на Блискиот Исток ќе го одвлече вниманието од неговите злосторства во Украина“.
„Таа пресметка не смее да успее. Многу јасно гледаме колку се испреплетени овие два конфликта. Русија очигледно го поддржува Иран со информации за потенцијални цели“, рече тој.
Во своето обраќање, Вадефул нагласи дека нема несогласување меѓу Берлин и Вашингтон по прашањето за Иран, додавајќи дека Иран не смее да се здобие со нуклеарно оружје или да претставува регионална закана, пренесува Ројтерс.
„Веќе ги чувствуваме економските последици насекаде, особено во Европа, и тоа доста значајно“, рече тој.
„Затоа, ги разгледавме овие прашања многу темелно и апсолутно нема несогласување. Немаше и нема барање од Соединетите Држави, првенствено до нас, за воен придонес пред крајот на непријателствата.“
Тој предупреди дека поддршката за Украина не смее да се забави поради конфликтот на Блискиот Исток, пишува „дпа“.
„Не смее да има компромис по прашањето за одржување на одбранбените капацитети на Киев“, рече министерот од редовите на Христијанско-демократската унија (ЦДУ).
Вадефул нагласи дека притисокот врз Русија мора да остане силен, наведувајќи санкции, акција против руската „флота во сенка“ и притисок врз рускиот енергетски сектор.
Осврнувајќи се на војните во Украина и Иран, германскиот шеф на дипломатијата рече дека е сосема јасно дека воздушната одбрана ќе стане од клучно значење во иднина.
Затоа, германските вооружени сили планираат да набават такво оружје, а одбранбената индустрија на Германија и Европа ќе мора да размисли како да стане поефикасна во таа област, заклучи тој.
