Ресортот „St. Bernardin“ се наоѓа речиси точно помеѓу Пиран, шармантно гратче што дише во старински ритам, и Порторож, „создаден“ за туристи, па затоа за многумина е најлогичен избор кога одат на море во Словенија.

Сепак, ова место не е само преноќиште — тоа е своевидна туристичка атракција само по себе. А тоа ви станува јасно уште кога на шеталиштето ќе застанете пред терасите што се спуштаат по масивната бетонска конструкција на „Grand Hotel Bernardin“, толку карактеристична за југословенската хотелска архитектура.

Оваа зграда е центар на комплексот и секако негов најрепрезентативен дел. Интересен податок е тоа што рецепцијата се наоѓа на 11. кат, а холот е уреден така што го оправдува она што денес се смета за стандард со 5 ѕвезди, но истовремено го задржува и старинскиот шмек, со пригушени нијанси, темно дрво, раскошни лустери и ретро мебел.

Особено ќе ви нагласат дека овде секоја соба има тераса со поглед кон морето, а на самиот врв е сместена и најголемата конгресна сала во Словенија.

Освен „Grand Hotel“, комплексот содржи уште неколку објекти од различни категории, велнес и спа-центри, воден парк посебен по тоа што инсистира на базени со топла морска вода, уредени плажи, ресторани и барови...

А пред хотелот „Histrion“, кој исто така е дел од комплексот, се наоѓаат остатоци од црква од 15 век, кои денес служат како сценографија за различни културни настани, но и потсетуваат дека историјата на ова место оди уште подлабоко во минатото.

Од манастир до луксузен хотел

Просторот на „St. Bernardin Resort“ има многу подлабоки корени отколку што изгледа на прв поглед. Во 15. век, на ова место биле изградени манастир и црква посветени на Свети Бернардин. Тој комплекс бил дел од религискиот живот во регионот и служел како место за аџилак.

По укинувањето на манастирот на почетокот на 19 век, објектите ја изгубиле својата првобитна функција. Подоцна локацијата ја презела австриската војска и ја претворила во воената база за контрола на Пиранскиот Залив, по што комплексот постепено почнал да пропаѓа.

До средината на 20 век ова подрачје немало туристичка намена, туку дури служело и како бродоградилиште за помали бродови.

Клучниот пресврт се случува на почетокот на 1970-тите, со започнувањето на проектот „Hoteli Bernardin“, како дел од поширокиот бран туристичка модернизација во тогашна Југославија. Тогаш Порторож станува едно од клучните летувалишта на северниот Јадран, а хотелскиот комплекс симбол на луксуз во духот на модернизмот и функционализмот.

„Istriana“ концепт

Од основањето па сè до денес, ресортот поминал низ повеќе фази на приспособување кон пазарот, но — додека сме сведоци како многу други југословенски „бисери“ се уриваат пред современите урбанистички планови или се препуштени на времето — овој и понатаму ја исполнува својата функција, користејќи го сопственото минато како дополнителен естетски и културолошки адут, а со понудата и квалитетот на услугата одговарајќи на барањата на современите туристички трендови.

Современиот идентитет на ресортот во голема мера е резултат на интензивните реновирања во последните години, кои имале неколку цели: модернизација, енергетска ефикасност и зајакнување на концептот „Istriana“ — автентичниот идентитет на Истра.

Така, ќе ве пречекаат соби со мотиви на море, лаванда и маслинки. Во рестораните ќе ви понудат „типичен истарски појадок“, како и специјалитети базирани на традиционалната кујна и локалните намирници. А ќе ги јадете со поглед кон морето (од кое пристигнува свежата риба), маслиновите насади (од кои набавуваат маслиново масло) и Сечовелските солини, познати по цветот на солта што се собира рачно.

А потоа ќе се спуштите во спа-центарот, каде што на располагање ви се третмани збогатени со домашни состојки како морска сол, солен кал, маслиново масло, лаванда, рузмарин и други истарски билки...

Секако, тука се и базените — во кои и во зима може да се ужива во морска вода, како и плажите — кои можеби не се песочни и не се најубавите што ќе ги видите, но се совршено уредени и организирани, така што мирно можете да уживате во морето и сонцето.

Ете, така Словенците се однесуваат кон своето наследство и природно богатство — за уште фотографии и впечатоци, заследете ја страницата „Putničarenje“ на Инстаграм.