По стабилното и невообичаено топло пролетно време во многу делови од Европа, се подготвува остар потсетник дека зимата сè уште не е завршена.
Како што наведува „Severe Weather Europe“, во тек е голема промена што носи студ, снег и потенцијално штетен мраз во многу делови од европскиот континент.
По конечниот колапс на поларниот вител, се очекува остар пад на температурата од 15 до 20°C за само два дена.
Промената на времето почнува уште денес, кога висок воздушен притисок се воспоставува над Северниот Атлантик. За Централна Европа и Балканот се прогнозира обилен снег, а во некои подрачја би можело да наврнат и повеќе од 50 сантиметри.
Исто така, снег би можело да има и во делови од Обединетото Кралство, Бенелукс, Германија, Франција, Чешка, Словачка и Полска.
Временската состојба, која се формира во последните денови од март, претставува класичен доцносезонски арктички продор во Европа. По стратосферското затоплување на почетокот од овој месец, дојде до конечно нарушување и колапс на поларниот вител, како и до поместување на арктичкиот воздух. Тој потоа носи продолжен период на подинамично време со зимски услови, снег и силни мразови.
Поларен вител е називот за зимската циркулација над северната хемисфера. Тој се дели на горен (стратосферски) и долен (тропосферски) дел. Поларниот вител поминува низ двата слоја, но со различна сила, облик и влијанија. Силен поларен вител може да го задржи постудениот воздух во поларните региони, спречувајќи го неговото движење. Тоа обично создава поблаги услови за поголем дел од Соединетите Американски Држави, Европа и други подрачја на средните географски широчини.
Слаб поларен вител, од друга страна, носи студено време. Самото нарушување обично настанува поради пораст на притисокот и температурата во стратосферата, односно поради стратосферско затоплување. Кога, пак, поларниот вител ќе се наруши или урне, тој повеќе не може целосно да го задржи студениот воздух, па тој излегува од поларните региони кон средните географски широчини.
Кон средината на оваа седмица, поточно по вторник и во текот на среда и четврток, се очекува распространетите врнежи да преминуваат од дожд во снег. Имено, системот поврзан со низок воздушен притисок над северна Европа напредува југоисточно преку западна Европа, носејќи значителен пад на температурите.
До среда студениот бран ќе го зафати алпскиот регион, а до четврток ќе дојде и до развој на низок притисок над Италија кон Јадранското Море. Обилните врнежи ќе се судрат со арктичката воздушна маса и ќе преминат во снег, а се очекува над Балканот да се создадат услови за снежна бура.
Како што поларниот фронт носи значителен студ длабоко кон југ, снег би можело да има од Обединетото Кралство до Франција, но значително повеќе над Централна Европа, Алпите и Балканот. Локално се очекуваат од 20 до 40 сантиметри снег, а значително повеќе на планините. На пример, делови од северните Алпи би можеле да добијат од 75 до 100 сантиметри нов снег до недела.
Најстудената воздушна маса ќе биде над западна Европа во среда и четврток, со утрински минимални температури до-2°C над Англија, северна Англија, Велс и Ирска. Повеќе студ ќе се развие над Франција и Бенелукс во четврток, со температури што ќе паднат на-2 до-6°C во многу региони.
Тоа заладување ќе трае и во петок и сабота, кога постепено ќе почне да слабее. Што се однесува до Централна Европа, студените температури ќе се прошират над Германија, алпскиот регион и Чешка до четврток и петок, со локални утрински минимални температури под-5°C.
Слични услови се веројатни и над северниот дел од Балканот, со неколку степени под нулата во двата дена. Условите ќе останат слични и во текот на викендот, со голем студен воздушен басен што ќе стагнира над Балканот најмалку до недела.
