По повеќе од една деценија на пазарот и со над 115 милиони продадени примероци, ерата на една од најпопуларните гејминг конзоли на сите времиња, „PlayStation 4“, полека се приближува кон својот крај. „Sony“ во средината на октомври 2024 година потврди дека од 2026 година ќе започне постепено укинување на поддршката за клучните услуги, што е јасен сигнал за насочување кон актуелната генерација и идните проекти. Иако во јавноста се појавија и дезинформации за целосно гасење на серверите, ситуацијата е нешто покомплексна, но пораката е иста – време е за збогување.

Конзолата, која беше лансирана во 2013 година, дефинираше цела генерација гејмери и стана дом на некои од најпознатите ексклузивни наслови како „The Last of Us Part II“, „God of War“, „Marvel’s Spider-Man“ и „Bloodborne“. Токму поради огромната база корисници и неверојатната долговечност, веста за крајот на поддршката за многумина претставува емотивен момент, иако станува збор за очекуван и логичен деловен потег.

Што точно се гаси од пролетта 2026 година?

Според интерни документи што протекоа во јавноста, а прв ги објави порталот „Insider Gaming“, „Sony“ од пролетта 2026 година ќе престане со поддршка за низа таканаречени „legacy“ услуги на „PSN“ („PlayStation Network“). Важно е да се нагласи дека оваа промена се однесува исклучиво на новите игри што ќе бидат поднесени на сертификација по тој датум. Тоа значи дека развојните студија кои ќе сакаат да издадат нови наслови за „PlayStation 4“ повеќе нема да можат да интегрираат одредени постари мрежни функции.

Листата на услуги што се укинуваат за новите игри ги вклучува „Activity Feed Web API“, кој служеше за следење на активностите на пријателите, „Shared Media Web API“ за споделување скриншоти и видеа, како и специфични системи за складирање податоци за игрите и корисничките поставки познати како „Title Small Storage“ („TSS“) и „Title User Storage“ („TUS“). Покрај тоа, се укинуваат и интеграциите со корисничките профили, како и старите системи за филтрирање несоодветна содржина. Од „Sony“ појаснија дека „овие услуги се дизајнирани за да обезбедат поунифицирана и поскалабилна основа низ генерациите на конзоли“, со што ресурсите се пренасочуваат кон „PlayStation 5“ и идните платформи.

Паниката е непотребна, постоечките игри ќе продолжат да работат

Веста за укинувањето на услугите брзо предизвика гласини за целосно гасење на серверите на „PS4“, што предизвика загриженост кај милиони сопственици на конзолата. Сепак, тие тврдења не се точни. „Sony“ не најави укинување на онлајн функционалностите за постоечките игри. Со други зборови, вашата дигитална библиотека останува безбедна, а онлајн мултиплеерот во насловите што веќе ги поседувате ќе продолжи да функционира нормално засега.

Промените, значи, се однесуваат исклучиво на идните наслови, чиј развој за старата платформа ќе стане технички покомплициран и помалку исплатлив. Тоа сигурно ќе ги обесхрабри повеќето големи издавачи, па се очекува дека по средината на 2026 година на „PlayStation 4“ ќе пристигнуваат претежно помали, независни наслови.

Пошироката слика: „PS Plus“ и големите издавачи исто така ја напуштаат „четворката“

Укинувањето на „legacy“ сервисите е само дел од поширока стратегија. „Sony“ веќе претходно потврди дека од јануари 2026 година месечната понуда на игри во рамките на претплатата „PlayStation Plus“ ќе биде првенствено насочена кон „PlayStation 5“. Насловите за „PS4“ ќе се појавуваат само повремено, најчесто како верзии што се достапни на двете генерации.

Освен „Sony“, и други големи играчи во индустријата постепено се откажуваат од старата конзола. Поради техничките ограничувања на хардвер стар повеќе од десет години, но и фактот дека „PlayStation 5“ конечно е глобално достапен и има значително зголемена база корисници, бројни издавачи на „live service“ игри планираат да ја укинат поддршката за верзиите за „PS4“.

Овој тренд веќе започна, а во наредните години ќе стане правило, а не исклучок. Производството на сите модели на „PS4“ конзоли беше прекинато уште во текот на 2022 година, со што „Sony“ јасно покажа дека сите ресурси сега се насочени кон сегашноста и иднината, која ја симболизираат „PS5“ и веќе често споменуваниот „PlayStation 6“.