Продажбата на автомобили денес е потешка од кога било. Иако постојат повеќе канали од порано – од специјализирани веб-платформи до социјални мрежи и видео-огласи – купувачите се повнимателни, конкуренцијата е поголема, а пазарот сè повеќе бара. Токму затоа некои продавачи се обидуваат да пронајдат сосема нови начини како да го привлечат вниманието на потенцијалните купувачи.
Еден од нив е Ендрју Хирс, 38-годишен школуван оперски пејач од Кокоа во Флорида, кој по намалувањето на бројот на ангажмани во операта решил да побара постабилна работа. На почетокот на годината се вработил како продавач на автомобили во автосалонот „Boniface Hiers Chrysler Dodge Jeep Ram“.
Иако го дели презимето со сопственикот, со него не е во роднинска врска. Како нов во продажбата, брзо сфатил дека ќе мора дополнително да се потруди за да се истакне меѓу колегите и да постигне подобри резултати.
Огласи со оперски арии
Хирс затоа дошол до необична идеја. Наместо класични продажни огласи, почнал да снима видеа во кои автомобилите ги претставува пеејќи оперски арии.
Првото видео го снимил покрај користен „Corvette“, додека ја пеел познатата арија „Nessun Dorma“ од операта „Turandot“ на композиторот Џакомо Пучини.
Видеото било објавено во февруари и брзо станало вирално, собирајќи повеќе од еден милион прегледи на „TikTok“ и илјадници прегледи на „Instagram“. За необичниот продавач на автомобили пишуваше и „Washington Post“.
„Corvette“-та од видеото на крајот не го продал Хирс, туку еден од неговите колеги. Тоа, сепак, не го обесхрабрило. Напротив, снимил уште едно видео, овојпат со аријата „Una Furtiva Lagrima“, во кое на духовит начин ја коментирал целата ситуација.
Оттогаш продолжува да снима видеа во кои пее додека претставува користени автомобили и нови модели од понудата на „Stellantis“. Во секое видео ги потсетува гледачите дека во автосалонот „да го побараат Ендрју“.
Вирално видео не гарантира продажба
И покрај големата популарност на социјалните мрежи, продажните резултати засега се скромни. Според пишувањето на „Washington Post“, на почетокот на овој месец продал само еден автомобил.
Хирс на целата ситуација гледа прагматично. Смета дека искуството во продажбата може да му помогне и во музичката кариера.
„Мора да знаете да се продадете како продавач. А исто така мора да знаете да се продадете и како оперски пејач“, изјавил тој.
Неговата приказна воедно покажува дека виралната популарност не мора да значи и деловен успех. Видео-содржините на социјалните мрежи можат да привлечат огромно внимание, но тоа не гарантира и реална продажба. Во светот на продажбата на автомобили, очигледно, е потребно нешто повеќе од оперска арија.
