Фустанот е создаден во соработка со модниот дизајнер Кристијан Кован и брендот за нега на коса „TRESemmé“. За неговата изработка биле искористени речиси пет килограми коса, пишува „People“.

Креација тешка пет килограми

Дизајнерот Кристијан Кован на 14 март на Инстаграм ја најави соработката со видео што ја прикажува изработката на фустанот, со опис: „Коса од А-листата во ново, спектакуларно издание“. За уникатниот фустан на Рина употребил речиси пет килограми човечка коса набавена од проверени, етички извори, и тоа од три различни добавувачи.

Секој прамен бил внимателно избран за да одговара на бојата на косата на Рина, а потоа бил подготвен со производи од нивната линија пред рачно да биде сошиен на основата на фустанот. За корсетот да добие измазнет и сјаен изглед, тимот на Кован користел крема за измазнување, додека на долниот дел од фустанот со спреј за текстура му дале волумен и движење.

Реакција од семејството и порака до другите

Рина вели дека скицата од фустанот му ја покажала на својот сопруг Хари Хамлин, како и на ќерките Делајла Бел и Амелија Греј, а нивната реакција не ја изненадила. „Ме познаваат доволно добро за да знаат дека би направила нешто вакво. Реакцијата беше отприлика: ‘Да, тоа е баш нашата мама. Одлично’“, објасни таа.

Свесна е дека ваквиот моден избор е прилично екстремен, но се надева дека со својата храброст ќе ги поттикне и другите да бидат похрабри во облекувањето. „Модата е уметност и начин на изразување. Искрено уживам во тоа и верувам дека, кога другите ќе видат колку нешто ве радува, и самите ќе помислат: ‘Еј, можеби и јас би можела да го пробам тоа’ или ‘Можеби би можела да ја сменам фризурата или да ставам перика’. Што и да е, се надевам дека ги поттикнувам луѓето да се осмелат да експериментираат“, заклучи таа.