Експертите советуваат едноставни, но ефикасни чекори. Држете го мобилниот телефон најмалку еден метар оддалечен од креветот, а идеално би било навечер воопшто да не се наоѓа во спалната соба…
Мобилниот телефон е последното нешто што го погледнувате пред спиење и првото што го земате во рака веднаш штом ги отворите очите?
Ако потврдно кимнавте со главата – не сте единствени. Во ерата на постојана поврзаност телефонот стана продолжение на раката, па не изненадува што многумина буквално одат во кревет со него. Но иако мобилниот телефон нема да ве „озрачи“ до болест, експертите предупредуваат дека може сериозно да го наруши она најважното – квалитетниот сон.
Да почнеме од најчестата грижа: зрачењето. Радиофреквентните бранови што ги емитуваат мобилните телефони спаѓаат во нејонизирачко зрачење, што значи дека не ја оштетуваат ДНК како што тоа го прават рендгенските зраци. Големите здравствени институции наведуваат дека нема докази дека спиењето покрај мобилен телефон го зголемува ризикот од рак. Значи, митот за „пржење на мозокот“ може мирно да го отфрлите.
Но тоа не значи дека спиењето со мобилен телефон е без последици.
Најголемиот проблем е – сината светлина. Екраните емитуваат светлина што го потиснува лачењето на мелатонин, хормонот задолжен за заспивање. Кога пред спиење скролате по социјалните мрежи, гледате видеа или одговарате на пораки, вашиот мозок добива сигнал дека е ден, а не ноќ. Наместо да се опушта, тој дополнително се стимулира. Резултатот? Потребно ви е повеќе време за да заспиете, сонот е поплиток, а наутро се будите исцрпени.
И тука приказната не завршува. Дури и ако заспиете, мобилниот телефон може да ве разбуди. Една вибрација, звук од известување или блесок од екранот среде ноќ може да ги прекине фазите на длабок сон.
Таквата фрагментација на сонот го намалува неговиот квалитет и траење, а на долг рок го зголемува ризикот од покачен крвен притисок, дебелина, дијабетес и проблеми со концентрацијата.
Тука е и психолошкиот фактор. Кога телефонот е веднаш до перницата, потсвесно остануваме „на штрек“. Чувството дека мораме да бидеме достапни – за работа, пораки или социјални мрежи – го отежнува целосното опуштање. Многумина признаваат дека, штом се разбудат среде ноќ, автоматски го проверуваат екранот. Тој маѓепсан круг создава немир и го зголемува нивото на стрес.
Затоа експертите советуваат едноставни, но ефикасни чекори. Држете го мобилниот телефон најмалку еден метар оддалечен од креветот, а идеално би било навечер воопшто да не биде во спалната соба. Воведете „дигитален полициски час“ – последниот час пред спиење без екрани. Наместо скролање, одберете книга, топла бања, тивка музика или кратко истегнување.
Ако алармот ви служи како изговор телефонот да мора да биде покрај главата, размислете за класичен будилник. Можеби звучи старомодно, но квалитетниот сон никогаш не излегува од мода.
Бидејќи на крајот, пораките, мејловите и известувањата можат да почекаат. Вашиот сон – не може. А добриот сон значи подобра концентрација, повеќе енергија и постабилно расположение веќе следниот ден. Можеби е време вечерва, барем за проба, мобилниот да го оставите малку подалеку од перницата.
