Нејзиниот најголем остров е Крит, а најсеверниот Тасос е оддалечен од копното само седум километри. Освен што е популарна туристичка дестинација, познат е и по обработката на својот прочуен бел мермер и по производството на врвно маслиново масло, а има и еден од најубавите природни базени во цела Европа, ако не и во светот.

Тоа е лагуната Гиола, која не престанува да воодушевува со своите тиркизно-смарагдни води и спектакуларна околина.

Длабока е околу три метри, дното ѝ е песочно, а „ѕидовите“ совршено мазни

Скриена меѓу карпестите литици на јужниот брег на островот, настанала со ерозија на карпите во текот на милиони години, а Егејското Море постојано ја надополнува со бранови што се прелеваат преку тесниот раб кој базенот го дели од отвореното море.

Лагуната со димензии 20 × 15 метри е длабока околу три метри и доволно пространа за капење, дното ѝ е песочно, а „ѕидовите“ мазни.

Водата во базенот секогаш е потопла од морето, а нејзините нијанси се менуваат во зависност од светлината и временските услови, создавајќи волшебна игра на сини и зелени тонови.

Камените плочи околу лагуната, високи и до осум метри, се идеални за сончање, но и за скокање во кристално чистото море, додека почетниците и оние помалку храбри можат да уживаат во пливање покрај самиот брег.

До ова природно чудо води земјен пат долг два километри

Точно спроти Гиола се наоѓа и малото ненаселено островче Астириотико. Според локалното предание, на него живеат само сирени кои, кога ќе посакаат, доаѓаат да се капат токму во лагуната, позната и како „солзата на Афродита“. Имено, овој природен базен наводно го создал самиот бог Зевс, за во него да може да се капе неговата сопруга Афродита.

Друга легенда, пак, вели дека истиот бог ја создал Гиола во облик на око, за преку неа да ја набљудува љубовта на својот живот. Затоа лагуната добила и уште еден прекар – „окото на Зевс“. Ова природно чудо се наоѓа во близина на селото Астрис, од каде што земјен пат долг околу два километри води до самиот базен.

Ако не сте големи љубители на дивината, во близина постои и полуксузна опција

Имајте предвид дека околу лагуната нема никакви туристички содржини, па задолжително понесете крем за сончање, вода и грицки. Сепак, во екот на сезоната во околината обично работат неколку помали таверни, каде што може да нарачате барем помфрит, грчка салата, морски плодови или хамбургер.

Но не дозволувајте отсуството на луксуз да ве обесхрабри. Дури иако не сте љубител на дивината, искуството од посетата на Гиола секогаш можете да го збогатите со возење со чамец до попријателската плажа Псили Амос, со бар и лежалки, која е од лагуната оддалечена само десетина минути пловидба.

Тасос не се само плажи – истражете ги неговите села и зелената внатрешност

Во Гиола е најдобро да се дојде рано наутро или доцна попладне, кога таму нема голем метеж. Но и остатокот од Тасос вреди да се истражи: од зелената внатрешност и живописните планински села што го чуваат автентичниот начин на живот, до најголемото населено место Лименас, кое се гордее со својот археолошки музеј, акропол и антички театар со поглед кон морето.

Сè на сè, Грција е дестинација што никогаш не разочарува.