Фотографии од електрични автомобили кои се полнат од дизел-генератори со години кружат на интернет, најчесто од раните денови на електромобилноста. Меѓутоа, во 2026 година „Tesla“ навистина отвори ваква станица за полнење во Шведска – „Supercharger“ што работи на дизел-генератори.
Оваа станица на „Tesla“ се наоѓа во планинскиот град Вансбро, во регионот Даларна, познат по зимските туристички одморалишта. „Tesla“ ја постави таму како последна опција за полнење пред заминување кон планинските центри.
Судир со синдикатите
„Tesla“ веќе две години во Шведска води спор со синдикатот „IF Metall“. Компанијата упорно одбива да потпише колективни договори со работниците од сервисите и салоните, инсистирајќи на индивидуални договори. Во Шведска, колективното преговарање претставува стандард за големите компании, а „Tesla“ е единствената што не прифаќа таков модел – иако во други европски земји попуштила.
Овој став поттикна низа солидарни штрајкови дозволени со шведските закони. Работници од различни сектори почнаа да одбиваат услуги за „Tesla“. Шведската пошта престана да испраќа регистарски таблички за возилата на „Tesla“. Компанијата се обиде да го заобиколи тоа со ангажирање адвокати кои би ги барале табличките во нивно име, но и тоа пропаѓаше штом поштата ќе го препознаеше секој нов обид. На крајот, вработените во „Tesla“ почнаа да ги бараат табличките на своите приватни адреси и на адресите на роднини.
Дизел како привремено решение
Синдикатите на електричарите, исто така, одбиваат поврзување на новите станици на „Tesla“ на електричната мрежа. Тоа веќе минатата зима создаваше проблеми и го забавува ширењето на мрежата „Supercharger“. Овојпат „Tesla“ најде заобиколно решение.
Бидејќи станицата во Вансбро не доби дозвола за приклучок, „Tesla“ инсталираше големи батерии кои складираат енергија и ги снабдуваат полначите по потреба. Но, и тие батерии имаат потреба од напојување – тука настапуваат дизел-генераторите.
Генераторите автоматски се вклучуваат и ги полнат батериите на станицата, која потоа таа енергија ја пренесува во електричните автомобили. Технолошки парадокс за 2026 година, но „Tesla“ смета дека тоа е прифатливо.
HVO гориво како „зелена“ опција
Со цел да ги ублажи критиките, „Tesla“ истакнува дека генераторите користат HVO гориво – хидротретирано растително масло. По состав и карактеристики слично на дизелот, но произведено од растителна суровина. Теоретски, тоа го намалува CO₂ отпечатокот, бидејќи растенијата за време на растот апсорбираат јаглерод-диоксид од атмосферата.
„Tesla“ нагласува дека станицата во Вансбро ќе работи само сезонски, за време на зимскиот туристички период, и дека генераторите се само привремена мерка.
