Иако човечкиот живот одамна исчезна од Зоната на исклучување, последиците од хаваријата во реакторот број четири остануваат длабоко врежани во пејзажот – во бетонот, почвата и напуштените предмети што сведочат за драматичните денови по експлозијата.

Зоната на исклучување привлекува истражувачи

Еден од таквите предмет, речиси симбол на трагедијата во Чернобил во 1986 година, е металната канџа, дел од градежната машинерија што се користи за отстранување на високорадиоактивен материјал од урнатините на уништениот реактор.

Оваа масивна метална алатка остана напуштена во шумата, во близина на Припјат, каде што и денес зрачи – како тивок потсетник за обемот на катастрофата.

Со текот на годините, Зоната на исклучување привлекуваше истражувачи, документаристи и авантуристи. Меѓу нив е и јутјуберот Том, кој при неговата посета ги сними нивоата на зрачење околу металната канџа.

Неговите мерни уреди регистрирале таканаречени „жаришта“ – места со зголемена радиоактивност, доволно силни за да активираат аларм на контролниот уред.

Дали канџата е опасна?

Експертите објаснуваат дека радиоактивноста на канџата е очекувана, со оглед на тоа што таа била искористена за ракување со исклучително опасен материјал непосредно по експлозијата на реакторот.

Сепак, проценките покажуваат дека краткотрајниот престој во нејзина релативна близина не претставува сериозен ризик по здравјето.

Ова, се разбира, не значи дека живеењето во нејзина близина би било безбедно, но самата посета нема долгорочни здравствени последици, пренесува „Чернобил стори“ (Chernobyl Story).

„Слоновото стапало“ голема закана

И покрај радиоактивното минато, канџата со текот на годините стана необична туристичка атракција. Посетителите се фотографираа, па дури и се качуваа на неа, честопати потценувајќи го фактот дека се наоѓаат покрај објект кој некогаш бил директно вклучен во една од најлошите нуклеарни несреќи во историјата.

Овој контраст помеѓу опасноста и човечката љубопитност најдобро ја отсликува Зоната на исклучување во Чернобил – простор каде што природата полека се враќа, но радиоактивното наследство останува, пренесува „ЛАДБајбл“ (LadBible).

Иако металната канџа се смета за еден од најпрепознатливите остатоци од катастрофата, експертите истакнуваат дека тоа не е најголемата опасност во Чернобил. Вистинската закана е скриена длабоко под самиот реактор – во масата од екстремно радиоактивен материјал познат како „Слоновото стапало“, кој и денес се смета за едно од најопасните места во светот.

Што е „Слоново стапало“

Во срцето на озлогласената зона на исклучување во Чернобил се наоѓа смртоносен радиоактивен објект што некогаш можел да убие човек за само неколку секунди.

И денес „Слоновото стапало“ е синоним за смртна казна.

„Слоновото стапало“ е всушност маса од високо радиоактивен материјал формиран по нуклеарната катастрофа во 1986 година.

Само неколку минути изложување би предизвикало внатрешно крвавење, неконтролирано повраќање, дијареја (пролив) и по пет минути, сигурно, болна смрт.

Како што е објавено во научното списание „Наутилус“, 30 секунди изложеност на објектот ќе значи дека вашите клетки ќе почнат да крвават. Ако поминете 300 секунди во објектот, имате уште два дена живот, пишува „Унилад“.