Американската пејачка Чапел Роан се огласи по повод бројните коментари за својот впечатлив моден избор на доделувањето на Греми наградите, порачувајќи дека реакциите на нејзиниот изглед ги доживува со доза хумор.
Имено, 27-годишната ѕвезда се појави на доделувањето на наградите во фустан прицврстен со прстени на брадавиците, додека од тој дел кон подот се спушташе проѕирна бордо ткаенина.
По нејзиното пристигнување, модното издание брзо стана една од главните теми на разговор од овогодишниот црвен тепих и самата церемонија. И покрај бројните реакции, Роан стави до знаење дека коментарите не ја вознемируваат.
„Се смеам затоа што искрено не мислам дека оваа облека е баш толку скандалозна. Изгледот е всушност многу одличен и чуден. Препорачувам едноставно да ја користите својата слободна волја, навистина е забавно и малку глупаво. Благодарам на Греми наградите и на сите што гласаа за мене“, порача таа на Инстаграм.
Инаку, стајлингот за доделувањето на Греми наградите го осмисли нејзината долгогодишна стилистка Џенесис Веб, а Роан изгледот го надополни со фин златен накит од куќата „Buccellati“.
Иако оваа година не освои ниту една награда за која беше номинирана со песната „The Subway“, Роан минатата година ја освои наградата за најдобар нов изведувач.
Освен номинациите, Роан беше и една од личностите задолжени за врачување на наградите, но се чини дека номинациите и водењето на церемонијата „паднаа во втор план“ поради нејзината облека.
